Itophiyu dhaggesenni baca qarra la’ino gobba ikkiturono,jifantino ikkinniina ubbe di-egentino; xiiwantino ikkinnina hanukki yite di egentino yaanni Sidaamu dagoomi qoqqowi Pirezidante kalaa Desta Ledamohu coyirino. Techo xaadinose qarri qeelantannoha ikkikkinni mittimmatenni qeellete ilaala fullanni doogooti yaannino guwursino.Pirezidantichu sa’u lame lamalanni hanafe addi addi qoqqowubbate qooxeessubba daa’’atanni nooha ikkanna wocawaaro 4/2014 M.dirinni Bilaatte baxxitino wolqa qajeelshi mereershi qajeelshino safote olanto maassiissu yannara basete leelle assino hasaawinni, “Itophiyu Jifantanno ikkinnina qeelante di egentino” yiino.
Itophiyu afantanno base noohu jio-poletiku horonni luphiima ikkasinni baca jajjabba gobbuwa ille tugginoseta xawisinohu Pirezidantichu; Cancishaanchu HWHT gobba diigannonna gobbayidi wolquwa soqqamaancho ikke Itophiyu daga aana ola lallawino yino.
Xaa yannara gargarooshshu olanto sokkansa bareendetenni gumultanninna cancishaanch HWHT qorichishshanni noota xawisinohu kalaa Desti, Cancishaanchu HWHT na gobbayidi wolquwa higgannokki gede assate ka’ino Itophiyu daga korkaatinni 40 diri giddo nookki kaajjadonna yannaasincho olantote wolqa fultanni kalaqa dandiinoonnita xawisino.
Barraho Bilaatte maassantino filantino baxxitino olantote wolqa miilla “Bareeda” yite bokkeessitinohu kalaa Desta; Sidaamu qoqqowi gargarooshshu Olantorano ikko Bilaatte Bilaatte baxxino gaadi wolqa qajeelshi mereershira assanno irko suffannota buuxisino.
Sa’u lame lamala giddo Amaaru qoqqowira leelle juntu kalaqino cancinni gawajjantino bissa towaatinohu kalaa Desta 10ki qoqqowo ikkine uminke umonke massanganni hee’noommohu soorrote gashshootinni ikkinota xawisatenni qoqqowinke wolootta qoqqowubbara badhe ikkatenni gobba diigara kaino diina mittimmatenni shore 2014 M.dirinni keeraanchonna Ge’ino Itophiya la’ate mittimmanke suffannote yiino.
Assinoommo towaanyonnino Juntu baxxinohunni Amaaru qooxeessira lowo gawajjo iillishinota buunxoommohano ikkiro xa mootimmanna dagano halante adhitanni noo qaafonni kayinni albillicho muli yanna giddo wirro ka’’annokki rumuxxannokki garinni rumushshosi buqqinse hunatenni gobbate keere buuxinsannitano huwantoommo yino pirezidaantichu kalaa Desta.
Olliicho siatinohu meessira di elanno yinohu pirezidantichu; Sidaamu qoqqowi Itophiyaho qaccetenni qaccete geeshsha keere agarsiisatenna addi addi kaa’lo assatenni Juntu co’o yaa geeshsha goxicho di afidhino yee; Sidaamu daga Itophiya sufisate mangistete qote uurransanni jawu galatinna ayirrinyi hasiisannonsa yiino.
Yaareed Geetaachew
Bakkalcho Wocawaaro 6, 2014 M.D Hamuse
