Addis Ababa: Itophiyunnita gobboomu horo rooru garinni ayirrisiisatenna yanna xa’mitannoha dippilomaasete looso loosate qixxaawo assinoonnita IFDR La/Xaphoomu Ministirchinna Gobbaydi Hajo Ministirchi Kalaa Demmeqe Mekonninihu egensiisi.
Gobbaydi hajo ministeere ministeerete loosaasinenna sokkonnsa gudde gobbansara higganno soqqamaasine qajeelshu hanafo atoomi aana hasaawa assinohu Kalaa Demmeqe; yanna xa’mitanno dijitaale dippilomaase looso kaajjino garinni loosate jawa illacha tungoonni yino.
Gobbaydi hajo ministeere yannate ikkitanno haaro tantano diriirsatenni muli yannanni wo’mu loosi giddora e’anno yinohu Kalaa Demmeqe; haaro tantanonni rosantino dippilomaase ledo xaadisatenni dijitaale dippilomaase gumaamu garinni soqqamaasinetenni loosu aana hosiisate qixxaawo assinoonnita egensiisino.
Gobbaydi hajo ministeere gobbanketa gobboomu horo agarsiissanni daggino uurrinshaati. Aanteteno yanna xa’mitanno tekinoloojete horonsi’raanchimma hala’ladunni loosu aana hossanno yinanni woyte albi assootenna ayimma hunatenni haaro wolqanninna assootinni riqiwamanno yaa ikkikkinni albi assootinni danchare adhatenni haaru assootinni qole roore elannoha dooratenni gobbanketa gobboomu horo buuxisiisanno garinni loosu aana hosiinsanni yino.
IFDR Lay/Xaphoomu Ministirchinna Gobbaydi Hajo Ministirchi Kalaa Demmeqe; kalqete dijitaale dippilomaasenni gumaamma ikkitino gobbuwa no; kuri gobbuwa rosicho karsinoonni. Gobbanke yannate hasattonna Jio-poletiku akata hedote giddo wortino dijitaale dippilomaase ministeerete deerrinni babbaxxitino soqqamaasinenni loosu aana hosiinsannino yino. Dippilomaatta gobbansa horo agarsiisate duuchanka woyte dargaho afante calla ikkikkinni tekinoloojeno kaima assino garinni millisa hasiissanno. Konnira ikkitanno tantanono loosantanno yino.
Yanna xa’mitanno hayyo loosu aana hosiisate dandiissiissanno xiinxallo assinoonnitano xawisinohu Kalaa Demmeqe; mittu mittunku soqqamaanchi poletikunna miinju hajubba aana loosino loossa hattono gobbate ledo noo xaadooshshinna amadisiisantino hajubba aana xiinxallo illachishshino. Sai 6 aganira assinanni keeshshinoonni xiinxallo gumulamasenni muli yanna loosu giddora e’nannita coyi’re; haaro gobbaydi hajo ministeere tantanno xawonna taalo ikkino garinni loosu aana hossanno yino.
Haaro tantano loosu aana hossanno woyte hasiisanno manchi, hasiissanno yannara hasiisanno darga gaamamanno gede sharro assinanni yinohu kalaa Demmeqe; kiirote batinyinni ikkikkinni qaranna gumaamo ikkitino mannu wolqa dargaho gaamantanno assatenni roorenka Itophiyu gottimma leellishate loossa loonsanni yino.
Kalaa Demmeqe xawishshi garinni; qaru loosu mini baxxino akatinni mereersha ikke owaatanno gede jawa tantanote soorro assinannitano qummi assino.
Jeefoteno gobba owaata ayirrinyeho; owaatate doorama jawimmate yinohu kalaa Demmeqe; mereershaho heedhe loossannorino ikko soqqamaanchimmate gaamantanno loosaasine gobbanke e’ino mitiimmanni fultanno gedenna Itophiyu halaale kalqete afisiisate kaajjite loosa heedhannonsata xawisino.
Kuni qaleelshino aantanno tonne barrubbara sufannoha ikkanno.
Addisu Adoola
Bakkalcho Wocawaaro 6, 2014 M.D Hamuse
