Addis Ababa:- Hasiisannokki garinni uduunnunna laalchu aana waaga leddinorinna seerimale assooti giddo e’inore 80 kume, 641 daddalu uurrinshuwa aana qaafo adhinoonnita dadalunna industirete ministere egensiissu.
IFDR Daddalunna Industirete Ministeere ministirchu komunikeeshinete amaalaanchi kalaa Wondaxir Mekonninihu Itophiyu pireesete uurrinshara xawisino garinni; seera agarsiisate gaadinni afi’nanni hee’noonni qeelle gufisate hedde seerimale assooti giddo e’e beeqqaano ikkitanna iillinoonnire daddalu uurrinshuwa badatenni seerunni qaafo adhinanni hee’noonni.
Kalaa Wondaxiri xawishshi garinni; Doolaarenna laalcho maaxxinore, hasiisannokkihanna korkaatiweelo waaga ledatenni cancishaancho HWHT gaamora kaa’lo assitanna iillinoonni bissanna uurrinshuwa aanaati qaafo adhinanni hee’noonnihu.
Konni garinnino 80 kume, 641 daddalu uurrinshuwa ittinse, 520 daddalu uurrinshuwaha daddalu fajjo hunatenni, 257 ikkitannore loosonsa ittinsoonnita kulinohu kalaa Wondaxiri; 2 kume 230 ikkitannori daddalu uurrinshuwa kisse hananfoonnita coyi’rino.
Miinju korkaati nookkihanna dikkote laalchunna uduunnu anje kalaqantinokkiha uminsanni anje noohu gede assite hasiisannokki garinni waaga ledatenni seerimale doogonni woxe gamba assi’rate loossannori noota qummi assinohu kalaa Wondaxiri; baxxinohunnino gobba diigate millissanni noori aana seera agarsiisate gaado harinsanni hee’noonni yannara togooha dagoomanna gobba qarru giddo tuganno assooti giddora e’inore mootimma dicincitanno yino.
Federaalete poolise komishiine, mashalaqqenna keeru, eotenna gumrukete biilloonyinna la’annonsa bissanni filantinorinna ministeretenni massagantanno qorqorshu wolqa uurrinseenna loonsanni hee’noonnita kulinohu komunikeeshinete amaalaanchi; hasiisannokki garinni laalchunna uduunnu aana waaga leddanni dagooma caacceessitannonna gobbate aana qarra gantanno bissanna daddalu uurrinshuwa aana hasiissannota kaajjado seeru qaafo adhinanni hee’noonnitano xawisino.
Amsaalu Felleqe
Bakkalcho Fooqa 4/2013 M.D Hamuse
