Addis Ababa: Amaaru Qoqqowira horrino qarqartora afantanno baalanta Ameeriku Kaa’lote Uurrinshubba cancishaanchu HWHT qodhaanonni mulqamasenna diigamase Itophiyaho uurrinshate riqiwaanchi egensiisasi harunsite kalqete miidiyubba odeessitino.
Aljeziiru, Roytersi, Ajaans Firaansi, R F I na woloottuno galchimi miidiyuubba assoote albiidi qoolinsara haadhe fultino.
Ferensaayennihu Aljansi Firaansi Pireesi Itophiyu Biroodikaast Korpooraashiine bue assite loossino odoonni Itophiyaho Ameeriku Kaa’lote Uurrinsha Sooreessa ikkinohu Saani Joosi HWHT qodhaano Amaaru Qoqqowira horritino qarqarto baalate afamanno uurrinshate jajjanna kaa’lote uduunne wo’munni wo’ma mulqi’ratenni magaazeene mulla assansa odeessino.
“Tigiraayete shittu wolqa uurrinshanke gongo’maano, magazeenenna woloottano aduunne wo’ma mulqi’ransa buunxoommo; konni garinni mannoomitte kaa’lo iillishate lowo geeshsha mitiimmate” yaasi odoote hanqafisiisino.
Roytersi isi widoonni, fushshino odoonni uurrinshate qaalu saysaanchi kaa’lote eubba moorano ikko kaa’lote aana mereero ea co’o adhamooshshu dinonsa; kaa’lo hasiissannonsa mannira iillishateno lowo jifo ikkinonke yaasi xawisino.
HWHT wolqubba Tigirayete giddo wirro ciirtu gedendaanni qarqaru qoqqowubba ha’ratenni xibbu kuminni kiirranni keeraano manna mininsanninna jajjinsanni daransiisansano odoo xawissanno.
Aljeziiru isi widoonni, Ameeriku Kaa’lote Uurrinsha HWHT qodhaano mulqi’rate assoote gumultino gede buunxoonnita kaysino. Miteekke uurrinshate jajji gobbaanni kaa’lote beenkoonni mannoomittete kaa’lo sagale kaa’lamaanote anganni mide adhatenni ikkara dandaannota odeessino.
Saani Jeesi EBC ledo noosi keeshshonni “miteekke dibuunxoommolla ikkinnina HWHT qodhaano mittu mittunku manchiwiinni gatikkinni mulqidhe ikkara dandaanno” yiino.
HWHT qodhaano Amaarunna Affaarete Qoqqowo horritu kawa teessaanotennonnihanna mangittenni ikkino jajja mulqidhanni noo noo gede horrami qarqari teessaanonna mangitte marro marro egensiissanni keeshshitino.
Ikkollana kayinni kalqete miidiyuubba tenne hajora hasiisanno darga aa hoogansa korkaatinni qoqqowubbanna federaalete mangitte marro marro halaale afisiisate sharro assitanni keeshshansa qaanqanni.
EBC Ameeriku Kaa’lote Uurrinsha Itophiyu Qaru sooreessi ledo noosi hasaawinni HWHT wolqubba horritino qarqartora hala’ladore mulqi’ransa buuxi gedensaanni, batinye kalqete miidiyuubba hala’lado odoo odeessitanni afantanno.
Addisu Adoola
Bakkalcho Fooqa 4/2013 M.D Hamuse
