I t o p h i y u n n i t i m a a l a ’ l i s s a n n o t i beeddakko atileetitte Tigisti Aseffa Lendenete maaratoonenni haaro kalqete ayirrado yanna borreessiisatenni qeeltino. Kalqete beeddakko maaratoonete atileetooti heewisantannoti Lendenete maaratoone harisantu woyte Tigisti maala’lissanno dandoonni 2:15:50 guda dandiitino. Kunino seennu dodisaanonni ha’rinsoonni heewonni borreessaminoha haaro kalqete ayirrado yanna gawalo ikkino.
Diroho albaanni tenne heewora ayirrado yanna amaddinoti Keeniyu atileetitte Peersi Jiipichircheri yinannitenkanni. Tigisti albita ayirrado gawalo 26 lipheessinni woyyeessitino maala’lissanno dandoonni hettisamaanose sasu xiqqeessinni saino badooshshinni qeelase duuchu agarinokkitenkanni. Qeellete atileetitte harunsite Keeniyunniti Joysiliini Jiipikosge 2:18:43 ikkitino sa’’aatenni layinkita ikkite guddino. Jiipikosge niro 2:16:16 ikkitino sa’’aatenni qeelaancho ikkase qaangannite.
Tayxe kayinni qeeltino sa’’aatenni sasu xiqqeessinni badhera higgeeti layinkita ikkite guddinohu. Tayxeti qeellenniti Tigisti Aseffa niro tenne heewonni layinkita ikkite jeefissurono Keeniyu atileetitte qeelatenni gaabbose ayirrado yannanni dukkisantino qeellenni qo’litino/fultino. Tenne Lendenete maaratoonenni Tigisti wole gaabbono qeelletenni qo’litinote. Tenne Paarisi olimpike maaratoonete hiliccire balaxxese culku medaaliya lukkinota Nezerlaandisi beeddakko atileetitte Siifen Haseni Lendenetenni qeeltinose. Tigisti bayi’riidita ayirrado ikkitino yannanni baaliiqqino heewo xeertote olimpikete qeelaancho ikkite keeshshitinoti Siifen sasu xiqqeessi ale keeshshite 2:18:59 sa’’aatenni sayikkita ikkiteeti guda dandiitinohu.
Tigisti heewote olompiike aana jeefisatenni balaxxese culka lukkinoti atileetitte Siifeni Lendenete hettisamaancho ikkasenni Paarisete xaadinosehu hedeweelchu coyi xaadannoe yaatenni bidhatto galtinohe yitanno xa`mo shiqqeennase, ‘’heewo jeefisummahu gedensaanni jawa hagiirreeti macciishshaminoehu, hiitte doogonnino qeelate qixxaawoommankanni, jeefote sharrame qeelateno ikko seeda xeertinye albaanni massaganni qeelate qixxaawoomma, qaru coyi seekkine qixxaawate, assoommahuno togoonti, Paarisete Olimpike hiliccire layinkita ikke gudumma gedensoonni techo
qeelate luphiima hasatto nooenkannni, hatteerano kaajje qixxaawoomma, daafuri’ya guma afi’ra’yannino lowonta hagiirraamete’’ yaatenni basete leellitino tuqu xaadooshshuwara hedose uytino.
Tigisti meyaa dodisaanonni kalqete ayirrado bayi’ra yanna woyyeessitinoti ammanate ayirritanno dandoonni Ingiliizennitenni Pawula Raadikiliifi seeda dirrara amadde keeshshiishshinota Lendenete Maaratoone ayirrado yanna (2:15:25) woyyeessate shiqqe noohano ikkirono shiimare seyaa didandiinosenkanni. Olompiikete maaratoone birru medaaliy qeelaancho atileetitte borreessiissino yanna maaratoonete heewo dhaggesenni sayikki yanna wiinamu sa’’aateti.
Tigisti 2022 Berliinete maaratoone qeeltu woyte 2:15:37 ikkitinota wiinamu yanna borreessiisase anfoonnite. Aanino dirinnino Berliinete maaratoonera labballu dodisaanonni irkisante heettisantino heewonni 2:11:53 jeefisatenni xeertote haaro maaratoonete kalqennita ayirrado yanna cu’midhe kalqe maala’lisiisa dandiitinonkanni. Hatti ayirrado yanna kayinni 2024 Chiikaago maaratoonera Keeniyu atileetitte Ruzi Chipingetichi 2:09:56 ikkitino yannanni woyyeessantino.
Agarre keeshshinoonni Lendenete maaratoone labballu heewora Keeniyunnihu Saabastiyan Sawe 2:02:27 eatenni qeelaancho ikkino. Yugaandunnihu beeddakko Jakoobi Kiliimo 2:03:37 gobbasita ayirrado yanna woyyeesse layinkiha ikkatenni gudino. Wolu Keeniyunnihu Alekzaander Muttiso 2:04:20 sa’’aatenni sayikkiha, Nezerlaandennihu Abdi Nagaye 2:04:20 shoolki deerra amadino. Qeellete shiqinshoonihu olimpikete maaratoone qeelaanchi atileetichu Taammiraati Tola 2:04:42 sa’’aatenni ontikkiha ikke jeefisirono borreessiisino sa’’aate aanchino kalqete champiyoonira Itophiya riqiwate ikkannosi yine agarranni.
Demmellaash Demmeqe
Bakkalcho Dotteessa 23, 2017 M.D
