Addis Ababa:- Mootimma shiqishi’noommo xa’mubbara wiinamu dawaro qoltonkena yitanni Itophiyu loosaasinete maamarra konfedereeshiine xa’mitu. Loosunna dandoote ministere kayinni loosaasinete xa’mora dawaro qolate loonsanni hee’noonni yitino.
Itophiyu loosaasinete maamarra konfedereeshiine Pirezidaantichi kalaa Kaasahun Foollohu kalqoomu loosaasinete barra laise uyino xawishshinni; Xaphoomu ministirchi Abiy Ahimedihu (D/r) ledo assinoonni hasaawinni xa’monke adhamooshshe afidheenna hajo la’annonsa ministirootira faasho worroonni. Konninnino gama xa’mubba dawaro afidhinoha ikkirono qara ikkitinori loosaasinete xa’mubba diqolantino yiino.
Pirezidaantichu xawishshi garinni; hooffayidi aganu baatooshshi bikka murtannore aganu baatooshshi boorde uurrinsanni gede loosiissannorinna loosaasinete hajo lallawa kaajjinshoonni. Aganu baatooshshi boorde uurrisate wodho ministirootu amaale mininni fula hoogasenni loosu giddora e’nara didandiinoonni.
2017 M.D gutunni loosu mixo giddora e’noonnihanna mitte doyicho hasaamboommoha ikkirono qarru muddinoha ikkasi garinni illacha tunge wodho fushshine boorde rahotenni uurrinsanni gede kaajjinshe xa’mi’neemmo yiino.
Konni gobbaanni loosaasinete wolaphotenni tantanamate qoosso lainohunni kayinsoommo xa’mora uyino faasho garinni; qinaambe loonsanni hee’noommo yiinohu kalaa Kaasahuni; tantanate aana illacha tungoonninte gede tantanantino maamarra adhitannokkirinna maamaru massagaano miilla aana seerimale qaafo adhitanno loosiissannori aana mootimma seeru qaafo adhitanno gede xa’mino.
Uurrinshuwate loosu qooxeessi hobbaate lainohunni garunni loosu qorqorsha assa hoogatenni haammatu qansooti aana bisu xe’nenna lubbo hoogate qarrubba barru barrunkunni iillitannota xawise; harunso assate seeru garinni yawo uyinoonninsa bissa hasiisanno looso loossanno gede xa’mino.
Loosunna dandoote ministere loosiissannorinna loosaasinete hajo handaari minister dieeti kalaa Daanieel Tereessihu hajote aana Itophiyu pireesete uurrinshara uyino dawaronni; mootimma loosiissannorinna loosaasinete hajubba aana batinye haaroonso assitanni afantanno.
Aganu baatooshshe lainohunni babbaxxitino gobbuwara addi addi doogonni worranni; umikkiti loosiissannorinna loosaasinete mereero assinanni amaalammenni ikkanna; wole doogo kayinni mootimmate, loosaasinetenna loosiissannori mereero assinanni sumimmenni ikkanno.
Sayikki doogo, gobbate gede hooffayidi aganu baatooshshe bikka wora ikkinota qummeesse; togo assate loosu deerrinna akatu garinni hiikkunni loosu handaarira mageeshsha baata hasiissanno yaannoha murate batinye xiinxallo assa agarantanno yiino.
Sai mittu diri giddo mootimma hajote aana xiinxallo assitanni keeshshinota qummeesse; loosiissannorinna loosaasinete lallawi worino garinni mereersitinoti aganu baatooshshi boorde uurra hasiissannota xawisinno.
Tenne mereersitinota aganu baatooshshi boorde uurrisate qixxaawo assinoonni yiinohu ministr dieetu; boorde uurrisate illaallishshu wodho qixxeessine loosiissannorinna loosaasinete maamarra ledo umikki doyicho hasaawa assinoonni. Harancho yanna giddo taje hasiissanno harinsho sa’e ministirootu amaale minira shiqqeenna kaajjishate loonsanni hee’noonni yiino.
Wodho kaajjiteenna boorde uurrinsirono xiinxallote aana sanfe hooffayidi aganu baatooshshi bikka murate aantete gumullanni batinye loossa hee’ransa qummeessino.
Hooffayidi aganu baatooshshi bikka murannohu hooffayidiha ikkinohura mura umisenni loosaasinete agarsiisate kaa’litannoha ikkanno ikkinnina callicho mala ikkitannokkita qummeesse; Gobbate hooffayidi aganu baatooshshi bikka murriro nafa loosiissannorinna loosaasinete lamooshshu hasaawinni loosantanno loossa sufo heedhannonsa yiino.
Wole widoonni loosaasinchu wolaphotenni tantanamanno gede mootimma injoo kalaqqanni no yiinohu kalaa Daanieeli; loosiissannorinna loosaasinete mereero kalaqamannohu sumimmete hoongi laalchimmate aana luphiima xiiwo kalaqanno. Maamarrate tantanama qaru illachi gutu hajubba aana amaalantanno gede dandiisate ikkinota xawisino.
Mootimma hajote illacha tugge loosaasineno loosiissannorino tantanantanno gede injoo kalaqqanni afantannota kayise; lamente bissa ledo gutu mixo amande loosu giddora e’noonni. Worroonni seeri gobbaanni millissanno bissa heedhuro qaafo adhinannita qummeessino.
Loosu aana xaaddanno gawajjo ajishateno loossa loosantannota qummeessinohu kalaa Daanieeli; mitte mittente industire giddo ogimmate hobbaatenna fayyimmate amanyoote diriirsinanni hee’noonni. Konninnino loosiissannorinna loosaasinetenni fille uurrinsanni komitenni noo qarrubba tidhantanni hadhanno akatubba kalanqanni hee’noonnita huwachishinno.
Kalqoomu loosaasinete barra kalqoomu deerrinni 136 kkinna gobboomu deerrinni 50ki yannara techo Dotteessa 23,2017 M.D ayirrinsoonni.
Qiddist Gezzaheny
Bakkalcho Dotteessa 23, 2017 M.D
