Hawaasa:- Saadate laalchonna laalchimma lossate Saadate kittiwaate iillo lossa jawa qeecha afidhinota Sidaamu Qoqqowi Saadate Jiro Latishshi Biiro Sooreessi coyi’ri.
Biirote Sooreessi kalaa Tekle Jonba Itophiyu pireesete uurrinsha ledo assino keeshshonni xawisino garinni; qoqqowoho xaa yannara maatete jireenya buuxisiissanno yine xiinxallotenni bandoonnire babbaxxitino paakeejubba loosu aana hosiinsanni hee’noonni.
Kuri mereerinni lamala paakeejubba Saadate fayyimma ledo xaaddannota ikkasenni fayyimmansa garunni agarantinota assatenni handaarunni afi’nanni laalchonna laalchimma lossatenni dagooma horaameeyye assate illachunni loonsanni hee’noonnita egensiisino.
Qoqqowoho maatete jireenya loossa hananfi kawa deerru deerrunkunni afantannori handaaru ogeeyye olluubbate geeshsha iillite Saadate kittiwaate garunni iillishshanno gede assinoommo yiinohu kalaa Tekle; baalanti saada hasiissanno yannara kittiwaate afidhanno gede assinoonnita qummeessino.
Saadate fayyimma garunni agarsiisate xaginaatunkunni roore kittiwaate yannatenni aate illachinshanni yee; tayxe dirinnino 15 miliyoone dooze Lukkuwahonna wolootta Saadarano kittiwaate aate hende xaa geeshsha 17 miliyoone dooze kittiwaate uynoonnita xawisino.
Sooreessu xawishshi garinni; kittiwaatete owaante iillo mixote aleenni gumulloonni. Loosidhe gantinori gumaamma ikkitanno gede hasiisiro Saadate fayyimma garunni agara hasiissanno.
Tini mootimmate yawo ikkasenni ikkado baajeette gaamme hasiissanno waaco shiqinshanni. Balanxe kittiwaate uynanni daafira sa’u shoole dirra giddo baxxino garinni Saadate dhibbi dikalaqamino yiino.
Federaalete mootimma irkonni baatooshshiweelo dagganno xagganna kittiwaateno noota kulinohu Sooreessu; Saadate xaginaatinna kittiwaatete owaante uynanni uurrinshubba kaajjinshatenni xaggano hasiisanno garinni hirre shiqinshanniha ikkanna; sa’u honse agannara calla 29 woradda Saadate xagganna kittiwaate uminsanni hidha dandiitinota xawisino.
Qoqqowoho lamala paakeejubba aana addi xiinxallo assatenni xiinxallote kaiminni qooxeessubba, woraddanna loosidhe galtinore bande qachunni tantanatenni; loosidhe galtinore, ogeeyyenna hajo la’annonsa bissa paakeejubba lainohunni qajeelsine loosidhe galtinore horaameeye assa dandiinanni garinni loonsanni keeshshinoonnita lede qummeessino.
Amsaalu Felleqe
Bakkalcho Dotteessa 9, 2017 M.D Hamuse
