Addis Ababa:– Woradaho afantanno quchummara hasiissannota safote latishshuwa halashshate teessaano annimmatenni qeechansa fultanni afantannota Daarrate Woradi Quchumu Latishshinna Konistiraakshiinete Borro Mini egensiisi.
Wodiidi Sidaami Zoone Daarrate woradi Quchumu Latishshinna Konistiraakshiinete borro mini Sooreessi Kalaa Abbayneh Amelo Itophiyu pireesete uurrinshara xawisino garinni; woradaho afantanno quchumma teessaanote injiitinotanna yannitte assate addi addi tantano kaajjinshe loonsanni hee’noonni.
Woradaho xaa yannara sase maazzagaajju quchumma noota kule; quchumma diru giddo mixote garinni eo gamba assitanni dagate latishsha halashshitannoha ikkanna; eote ragaanni xaa geeshsha xibbuunni 90% ale gumula dandiinoonni yiino.
Dagatewiinni gamba assinanni eonni quchummate addi addi safote latishshuwa halashshate mixi’ne loonsannita kulinohu Sooreessu; lawishshaho, Qawaadunna Macciishsho quchummara giddo dooggara seesallicho karatenni teessaanote injiitino quchumma assate loonsanni hee’noonnita kaysino.
Quchummate agarroonni garinni safote latishshuwa hala’la hooggurono; giddo doogga, caabbichonna xalalu anganni way halashshora mootimma 60% qeecha afidhinoha ikkanna; teessaano kayinni 40% qeechansa fultanni afantannota qummeessino.
Daga kakkayisatenni giddo doogga fanatenna halashshate, fannoonni doogora kincho tugate looso loonsanni hee’noonni.
Ledoteno, gallanni mini qarra tirate xaa yannara Qawaadu quchumira fulo ajishshannore sette minna ijaarranni hee’noonnita egensiisino.
Quchummate biinfille ledannoha haanja latishsha halashshinanni hee’noonnitano hattonni.
Xalalu anganni waynna caabbichu anje qarra tirateno mootimma gaantanno woxu fulora qoteho dagoomuno luphiima qeecha fulanni afamannota lede qummeesse; dagannita latate hasattora mootimmate irkora ledote dagate beeqqono agarrannita ikkase huwachishino.
Quchummate lophora harancho yanna giddo buuxisiisateno mootimmate irkora ledote dagoomu agarranni qeecha garunni fulanno gede Sooreessu amadisiise sokkasi saysino.
Istiraateejike pilaanenni massagantannori Qawaadunna Macciishsho maazzagaajjubba ikkitanna; Saaffate maazzagaajji kayinni xintu pilaanenni massagamannoha ikkanna; Banqo, Deelunna Santichu quchumma kayinni Iskeechi pilaanetenni massagantannore ikkansa buuxisino.
Amsaalu Felleqe
Bakkalcho Dotteessa 9, 2017 M.D Hamuse
