Addis Ababa: Kalqete dona ikkinoha Sidaamu Daga diru soorro Fichee Cambalaallate Ayyaana Addis Ababu Quchumira baaliiqqino beeqqisiisaanchimmanninna hanqafaanchimmanni sa’u lamalara ayyirrinsoonni.
Addis Ababu Quchumira Teessino Sidaamu Dagoomi Maamari Sidaamu Budu Turizimetenna Ispoorte Biiro ledo halamatenni Jaaloomitte Tuutira qixxeessitinohu Fichee Cambalaallate Ayyaani xaphishshu amuraati aana afame hasaawa assinohu Addis Ababu quchumi layinki kantiiwi ba’lattonni quchumu gashshooti loosunna dandoote biiro sooreessi Kalaa Xiraatu Beyyene; Fichee Cambalaalla albi annuwinkeha ha’nura egenno qaagiissanno amanyoote ikkinota xawisino.
Ayyaanu Sidaamu ilama gibbo, giwanshonna gaanco tirte ayirrissanno keerunna araaru ayyaanaati yiino.
Kalaa Tiraatu Beyyene; ayyaanu xaa yannara Sidaamu daganni sae kalqete dona ikkatenni borreessaminota qaagiisse; konne ayyaana agarte tenne ilamara tareessitino annuwa galata hasiissannota coyi’rino.
Kuni ayyaani uttuwimma amadino ayyaanaati yiinohu Kalaa Xiraati; dagate ilama ikkitinori afantanno babbaxxitino gobbaydi gobbuwaranna qooxeessubbarano ayirrisamannoha ikkasino xawisino.
Konne bude garunni xiinxalline giddosi amadino balchooma horonsi’ra hasiissanno yee; ayyaanu iibbadu garinni ayirrisammanno gede qeechansa fultinore baala galate Fichee
jeeji jeeji yaanni kifichishino.
Budunna ispoortete ministeere ministiri deeti Nebiyyu Baayye isi widoonni; ayyaanu UNESCOte kikkinsannikki dona ikke borreessaminota qaagiisse; ayyaanu balchoomma agaratenni ilamate tareessamanno gede halamme loonseemmo yiino.
Kuni budi kalqoomu dona ikke borreessame balchoomisinninna hornyisinni Sidaamu ilamara, Itophiyahonna kalqoomu maatera dancha dhaggete lawishsha ikke horo aatenni dagasi naaxxisanno gede jawa qeecha fultino babbaxxitino bissara afanshu baraarsha uynoonniha ikkanna; ayyaanu amuraati aana Federaaletenna qoqqowu luphiima loosu sooreeyye, budu geerrinna babbaxxitinori baci dagoomunni woshshatto assinoonni wosini afamino.
Demmellaash Demmeqe
Bakkalcho Dotteessa 9, 2017 M.D Hamuse
