Addis Ababa:-Quchumu koriderete latishshi Hawaasi Garbi qooxeessi latishshano hedote giddo worinoha ikkasi Hawaasi Quchumi Gashshooti Kantiiwi Mekuriya Mershaye coyi’ri.
Kantiiwu Mekuriya Mershaye Itophiyu pireesete uurrinshara xawisino garinni; xaa yannara umikki doyicho layinki gafinni 12 km ale koriderete latishshi looso harinsanni hee’noonni. Quchumaho harinsanni hee’noonnihu koriderete latishshinni doogga calla ikkikkinni Hawaasi Garbi qooxeessa agarooshshe assatenna latisateno xaa yannara addi addi latishshi diizayne loonsanni hee’noonnita qummeessino.
Hawaasi quchumi su’maminohu Garbu su’minni ikkasinni; konne Garbanna giddosi amadinota kalaqamu jiro gawajjantukkinni horoonsi’ra dandiinanni garinni awuutanna agarooshshe assate loonsanni hee’noonnita qummeessino.
Kantiiwu xawishshi garinni; xaa yannara Garbu qaccenna qooxeessi latishsha hedote giddo wortino loossa harinsanni hee’noonni. Lawishshaho, Kolishshu wayinni Amoora Gedelinna Taaboori Ilaali geeshsha Garbu qacce latisate dandiinanni diizayne loonsoonniha ikkanna; looso hanafisiisate qixxaawo assinanni hee’noonni.
Konninni, quchumunni babbaxxitino ragganni daadanno lolahi dayno gedeenni Garba eannokki gede assate koriderete latishshi loosinni qixxeessinoonni baycho konfeenna keeshshihu 24 saate gedensaanni ishinunna allaggichurinni xalalino way callu daade Garba eanno gede assinanni.
Garbu co’ichimmanna giddosi noo kalaqamu jiro agarooshshira qoteho qooxeessaho addi addi boohaarshu bayichonna kalaqamunna mannu loosinorinni Garba gawajjitara dandiitanno assootubba gargarate dandiisiissannota babbaxxitino ijaarshubba loonsanni hee’noonnita kaysino.
Xaa geeshshano Garbunna qooxeessaho noo jiro garunni horoonsi’nikkinni keeshshinoonnita kule kantiiwu Mekuriya; tenne kalaqamu jiro garunni latinse hasiissanno horo afi’rate illachinshoonnita qummeessino. Quchumaho konni dirinni calla 4 biliyoone birra baajeette hasidhanno koriderete latishshi loossa qoqqowu mootimmanna quchumu gashshootinni harinsanni hee’noonni yiino.
Xaa yannara quchumunniha safote latishshi qarra tirtanno pirojekte loonsanni hee’noonnita kule; quchumaho loosantanni afantanno loossa ilamate reekkinannite yiino.
Noota kalaqamu jiro garunni latinse dagoomanna gobba horaameeyye assateno quchumu gashshooti illachunni loosanni afamannota egensiisino.
Quchumahonna qooxeessaho noo keere miinju widira soorratenni duuchu handaarinni dagoomu horaameessimma lossate quchumu gashshooti hixamanye loosanni afamannota lede xawisino.
Amsaalu Felleqe
Bakkalcho Dotteessa 2, 2017 M.D
