Hawaasa:- Haaruudde xaginaatu owaante lede isilanchimma afidhino owaante aatenni Hawaasi quchuma Meedikaale turizime mereersha assate loossanni afantannota Hawaasi Riferaale Xaphooma Ispeeshaalayzide Hospitaale egensiissu.
Hawaasi Yuniversite Fayyimmate Sayinse Kolleejenna Hawaasi Riferaale Xaphooma Ispeeshalayizide Hospitaale qaru dayrekterichi Dokter Alemu Xa’miso Itophiyu pireesete uurrinshara xawisino garinni; Hospitaale konni albaanni qooxeessaho 6 miliyoone dagoomu bissara owaante uytanno yine ijaarroonnite.
Ikkollana, xaa yannara uynanni owaante hala’lasenni; baxxinohunni, Sidaamu, Oromiyu, Wodiidi Itophiyinna Somaalete qoqqowubbanni owaante hasidhe daggannori 20 miliyoone ikkitanno dagoomu bissara owaante uytanni afantanno yiino.
Hospitaale xaa yannara baalanta kaanserete, giddoyidi xisso, darre xagisate hattono wolootta haaruudde owaantubba halashshatenninna hananfoonnire kayinni isilanchimma noonsa garinni owaattanni afantannota Dr.Alemu kulino.
Hospitaalete xaa yannara gonxe xagisi’nannihu 600 daallasi nooha ikkanna; barru giddo kageeshshi xagisi’raano goxxe owaante afidhannota qummeesse; owaante hasidhannori kiiro yanna yannatenni lexxitanni dagginota qummeessino.
Lawishshaho gederano, sai dirinni calla 180 kume ikkitanno owaatamaano goxe xagisi’rate owaante afidhinota qummeessino.
Hospitaalete qarunni isilanchimma noose owaante aatenni ledote Hawaasi quchuma Meedikaale turizime mereersha assate ajuuja amande loonsanni hee’noonnita Dokter Alemu coyi’rino.
Sai dirinni Hospitaalete dagge xaginaatu owaante afidhinori mereerinni xibbuunni 60 ikkitannori dagoomu bissa wolootta qoqqowubbanni dagginore Hawaasi quchumiranna qoqqowu giddo addi addi owaantubba afidhinore ikkansanni daa’’ataanote gede assine adhinannireetino yiino.
Konni kaiminni, Hawaasi quchuma Meedikaale turizime mereersha assate muli yanna giddo hanafisiinsanniri haaruudde xaginaatu owaantubba noota kule; kuri mereerinni mule hayishshine xagisate, giirate danonni gawajjaminore xagisatenna labbino owaantubba qarunni kullannireeti yiino.
Hospitaale konni garinni hixamanyite loossanni nooha ikkirono; hanafantunkunni kayse ijaarsha halashsha hoogatenni bayichu ruukkimma, gatamarshu loosi yinoonni yannanni goofa hooga, luphiima baajeettete anje, xagichunna xaginaatu uduunni hasi’noonni garinni wo’ma hooga, ogeeyyete kiiro anje hattono fayyimmate wowenni gamba assinoonni woxi yannatenni eo ikka hooga labbino foonqubba haaruudde owaantubba hasi’nanni garinni halashshate jawa jifo ikkitinota qummeessino.
Amsaalu Felleqe
Bakkalcho Dotteessa 2, 2017 M.D
