L/J Taaddese Worrede Tigrayete qoqqowi yannate geeshshira pirezidaante ikke mootoo`mino

-“Dhagge uytinosi kaayyo horonsi’rannota hexxo assi’reemmo” -Xaphoomu ministirchi Abiy Ahimed (D/r)

Addis Ababa:- Tigrayete qoqqowi yannate geeshshi pirezidaantichi letenaal jeneraal Taaddese Werrede dhagge uytinosi kaayyo horonsi`rannota hexxo assi’reemmo yee xaphoomu ministirchi Abiy Ahimed (D/r) xawisi. Letenaal jeneraal Taaddese Werrede Tigrayete qoqqowi yannate geeshshira pirezidaante ikke mootoo`mino.

Tigrayete qoqqowi yannate geeshshi pirezidaante biilloonyu reekko amanyoote tenne lamala giddo harinsoonni.

Xaphoomu ministirchi Abiy Ahimed (D/r) tuqu xaadi qooli aana sayisino sokkanni mittu agani albaanni Itophiyunniha bayriidi seera, Piriitooriyu sumiimmenna dipiloomaatiikete dagoomi amaale amadatenni hala`lado hasaawubba hadhanni keeshshitinota xawisino. Kalaa Geetaachew Redda biilloonyu yanna bayiriidi seeri garinni gooffanno woyte gattinota qara loossa gumulate yannate geeshshi mootimma sufa noose yitanno muro muratenni reekko ayi massage hendoonniwa iillishara dandaanno yitanno hasaawubba assinanni keeshshinoonnitano kaysino.

Xaphoomu ministirchi; keeraabbino doogonni haaru budinni biilloonyu reekko harisate qixxaabbino pirogiraame faajjetenni gumulloonni yiino.

Letenaal jeneraal Taaddese Werrede sa`u lame dirrara kalaa Geetaachew Reddahura aantaancho ikke owaatanni keeshshino yanna giddo noo laanfenna kaajjille xawunni hegersannotano sokkasinni huwachishino.

Konni korkaatinnino xa Tigrayete giddo noo xe`ne taashshe albira qaafisiisa dandaanno yitanno ammana baca bissanni ammannoonnita ikkase xaphoomu ministirchi xawisino.

Letenaal jeneraal Taaddese Werrede Tigrayete daga goodhino keerenna latishsha wolootta roduuwa gede fule eate hasatto gumulatenni Itophiyahono Afrikahono horo aanno coye loose sa“ate dhagge uytinosi kaayyo horonsi`rannota hexxosi xawisino.

Tigrayete qoqqowi beeqqisaancho yannate geeshshi gashshooti konni woroonni tittirotenni worroonni yawo fulate wo`ma wolqanninna jawaantetenni loosannota sheemaatu sanade aana xawinsoonni. Kurino darantino daga qaensara qolate harinsho, hanafotenni noohu jeefisamanno gedenna gattino qooxeessubbarano wiinamunni gumulamanno gede assa; Piriitooriyu sumiimme garinni qodho tidhatenna albi qodhaasine wirro uurrisate loosi rahotenni jeefisamanno gede; qoqqowoho seeru aliidimma buuxantanno gede, dagate hobbaatira, keerehonna ga`labbote gificho ikkitino seerimale millimillubba uurritanno gede assa; konnirano ikkado qorqorshunna seera ayirrisiisate looso loosa.

Uurrinshu latishshu loossa, mootimmatenna dagoomittete owaantubbanna mootimmate ijaarshi loossa lifixxanno gede, bayiriidi seerinna seeru amanyootinni, gobbate bayirroonyenna Piriitooriyu sumiimmenni miliqqino xaadooshshubbanna millimillubba uurritanno gede; qoqqowu dimokiraasete doorshira qixxaawa ikkanno gede; siviiletenna poletiku qoossubba gumulantino, poletiku badooshshubba dukkissanno dimokiraasete harinsho kalaqantanno gede loosa.

Qoqqowu daga babbaxxitino dagoomu kifillanna poletiku mannooti gobboomu amaalamme harinshonni beeqqitanno gede akatubba injeessa; qoqqowunnihu mootimmate miidiyinna komunikeeshiinete millimillubba gobbate daga halammenna xaadooshshe kaajjishshannore ikkansa buuxisate. Kuri aleenni tittirotenni worroonni yawubba haaru Tigrayete qoqqowi yannate geeshshira pirezidaante ikke mootoo`minohu letenaal jeneraal Taaddese Werrede jawaantetenninna ammanamooshushunni fulate qaale eino; malaatesino worino.

Gaazeexu Odeessaanchinni

Bakkalcho Dotteessa 2, 2017 M.D

Recommended For You