Addis Ababa:- Bansi woradira bocu dirinni rosunna fayyimmate handaarra aana dagate beeqqonni gumulantino loossa jawaachishshannota ikkitinota woradu gashshooti egensiisi.
Sai bocu diri giddo qarunni rosu guma woyyeessate hattono rosu hiiqqamme sissate illacha tunge loonsoonni.
Bansi woradi qaru gashshaanchi Kalaa Mesfin Ayyele Itophiyu Pireesete Uurrinshara xawisino garinni; Rosaanote gumi dirranni daasinni qoqqowu mootimma wortino ragi garinni woradu gede guma abbate rosu minna rosatenna rosiisate injiitinore ikkitanno gede assate looso loonsoonni.
Woradaho rosu gumi dirranno gede assitino korkaatta badatenni rosu minna rosatenna rosiisate harinshora injiitinorenna biifado assate 40 ikkitanno rosu minna dagoomu beeqqonni haaroonsate looso gumulloonnita buuxisino.
Kalaa Mesfin sai bocu diri giddo rosu handaarinni gumulloonni kaajjadu loosinni luphiima guma abba dandiinoonnita xawise; aantino yannarano rosiisaanotenna wolootta bissa ledo qinaambetenni loonsannita egensiisino.
Ledoteno woradaho 25 ikkitanno fayyimmate uurrinshuwa qooxeessu dagoomira uytanno owaante injitinotanna islancho assate dagooma beeqqisatenni 18 ikkitanno fayyimmate uurrinshuwa gatamarate looso danchu garinni loonsoonni yiinohu qaru gashshaanchi; 7 haaruudde fayyimmate uurrinshuwa loonsoonnitano xawisino.
Konninnino 6 agani giddo fayyimmate uurrinshuwa owaatamaanotenna owaataanote injiitinota ikkitanno gede assate ragaanni gumulloonni loosi jawaachishannoha ikkinota coyi`re; fayyimmate uurrinshuwano Federaalete deerrinni afamishsha afidhinota buuxisino.
Wole widoonnino olluubbanna woradda xaadissanno doogga dagoomu beeqqonni loonsoonnita xawise; dagoomu doogotennino horaameeyye ikkanno gede assate luphiima looso gumulloonni yiino.
Qaru gashshaanchi woradaho doogote qarra tirate baadiyyete olluubbara calla haaro 132 kiilo meetire meddi yitanno deerransa agartino doogga fanoonnita buuxise; 50 kiilo meetire ikkitanno albi dooggano dagoomu ledo halamatenni gatamara dandiinoonnita xawisino.
Abbebech Maatewoos
Bakkalcho Ammajje 27, 2017 M.D
