Addis Ababa:– Wodiidi Sidaami zoonera 2017M.D umikki bocu diri giddo dagate beeqqonni baca latishshu loossa gumulantinota xawinsi.
Wodiidi Sidaami zoone qaru gashshaanchi kalaa Mangashi Fiitamohunni massagantino zoonetenna woraddate massagaano gaamo zoonete giddo afantanno woraddara 2017M.D bocu diri giddo dagate beeqqonni loosantino latishshu loossa muli barrubba giddo towaanyo assitino.
Zoonennihu qaru gashshaanchi Mangasha Fiitamo tenne yannara coyiranni; konni albaanni daga shiqishidhino batinye latishshu xa’mo kaima assatenni baalanta xamo mootimma tira dandiitannokki daafira daga beeqqaano assine loosate assinoonni millimillonni daga kakkayinseenna mootimmate qote uurrite hala’lado loossa gumultanni afantanno yiino.
Konninni, haaro doogga loossa, galo doogga gatamarate, xalalu anganni way uurrinshubba loossanna caabbichu loossanna wolootano haammata loossa dagate beeqqonni loosantanni afantannota xawisino.
Ledeno, doogga dagate baca horo afidhinota xawise; tenne horo ha’nura ikkate daga fajjite jajjansa murte doogga fanatenna buussa karatenni assitanni noo jawaata sharrora galata shiqishe; kuri loossa albillicho sufisiisse harancho yanna giddo jeefissanno gede sokkasi saysino.
Amandoonni baajeettete dirinni zoonete 1400km doogo dagate beeqqonni loosate mixi’ne xaa bocu dirinni 1100km doogo loonse gumulloonnita Zoonete Quchumunna Safote Latishshi Biddishshi Sooreessi Mesaafint Mengesha xawisino.
Xaphoomunni, 189 haaro buussa karate mixi’ne 200 ale ikkitanno buussa kara dandiinoonnitano coyi’rino.
Alatta Wondi Woradi Gashshaanchi Girma Kebbede isi widoonni; woradu dagate beeqqonni haammatanna albissino millimillo assanni afamannotanna kuri giddonni, bushsha diriirsate loossa, 15 haaro buussa karatenna 4 buussa gatamarate, 185km doogote looso gumullonnita xawise; daga konni loosi giddora fajjitenna looso budensa assidhe loossanni afantannota xawisinota Zoonete Mootimmate Komunikeeshine Biddishshi mashalaqqe faajje assitino.
Gaazeexu Odeessaanchinni
Bakkalcho Ammajje 27, 2017 M.D
