– 17.7 miliyoone Ameeriku doolaare afi`noonni
Addis Ababa:- Sa`u onte dirra giddo 2 kume 664 toone ale waaga lexxitanno gede assine woyyeessinoonni avokaadote zayite gobbaydi dikkora shiqisha dandiinoonnita Sidaamu qoqqowi industirete paarkuwa latishshi korporeeshiine egensiissu.
Sidaamu qoqqowi industirete paarkuwa latishshi korporeeshiine qaru loosu gumulsiisaanchi kalaa Haylu Yetterihu xawisino garinni; sa`u onte dirra giddo 2 kume 664 toone ale Avokaadote zayte waaga lexxitanno gede assinoonnita gobbaydi dikkora shiqishatenni 17.7 miliyoone Ameeriku doolaare afi`noonni.
Xaa geeshsha gibrinnu laalchubba qineessate bobbakkino sette faabrikubba loosu widira e`inota xawise; kuri giddonni shoolu avokaadote zayite laalchinni bobbakkinota coyi`rino.
Kalaa Haylu avokaadote bura laalchubba baatto loosidhe galtinoriwinni galchi’ratenni dikkote xaadooshshe kalaqqinotano buuxisino.
Yirgaalamete agiro industirete paarke waaga lendoonnire yaano woyyeessinoonni gibrinnu laalchubba laashshatenni handaarunni horaameessimma lossate injaanno akata kalanqoonnita paarkete bobbakkino kubbaaniyyubba xawissino.
Injaanno safote latishsha wonshitinoti paarke gibrinnu laalchubba qineessinanni faabrikubba kaasatenni handaarunni afi`nanni horo lossatenni loosu kaayyo kalaqate dandiissitinotano xawissino.
Golden orgaaniik oyilinna faamili hani faabriku ayidde ikkinohu injiiner Zelaalem Weldaamanueel isi widoonni; paarkete giddo avokaadonna malawo qineessitanno lame faabrikubba loosu widira essinoonni yiino.
Dureessu avokaadote zayite faabrikinni calla dirunni 1 miliyoone doolaare geeshsha gobbaydi soorro afirate mixi`rinoha ikkanna waaga lendoonni malawo qineessateno loosanni afamanno.
Faabrikaho waaco shiqishshannota irshu pirojekite lede 2 biliyoone birra ale ikkitino fulonni qineessate loosi widira e“inotano injiiner Zelaalem huwachishino.
Avokaadotenna malawu laalcho shiqishshanno 110 kume ale baatto loosidhe galtinori ledo dikkote xaadooshshi kalaqaminota xawise; konninnino haammatu qansootira loosu kaayyo kalanqoonni yiino.
Hebiroon koofi annimmasi bikkantino hallanyu uurrinsha loosu harisaanchi kalaa Romiyo Zarameela isi widoonni; uurrinsha waaga lendoonni buna gobbaydira soyaate millissanni noota xawisino.
Faabriku barrunni 2 kume kiilo giraame buna xoxxiissate mixo noosita coyi`re; 10 baatto loosidhe galtinori ledo dikkote xaadooshshe kalaqatenni baatto loosidhe galtinori horaameeyyimma buuxisiisanni afamannota qummeessino.
Dureeyye paarke safote latishsha wonsidhinota ikkasenni waaga lendoonni laalchubba shotu garinni laashshate injaanno akata kalaqqinonsata xawissino.
Kunino handaaru lophonna horaameeyyimma buuxisiisate kaa`lannota kayissino.
Abbebech Maatewoos
Bakkalcho Ammajje 27, 2017 M.D
