Addis kalqoomu konvenshiine mereershi Addis Ababaho qoleno Itophiyahonna Afrikaho haaruudde kaayyubba fanannoho. Suffino jiro bue kalanqanniho; turistete goshoonsherano jawa qeecha godo’lannoha ikkinot ammannanni.
Tenne lamala goofimarchira Xaphoomu Ministirchi Abiy Ahimedihunni (Dr)
maassame looso hanafinohu Addis kalqoomu konveenshiine mereershi; kalqoomu konforaanse, daddalu, hasaawubbanna sumimmuwa, budu barubbanna addi addi reqecco owaantisate hattono haaruudde hedubba harinsanni daddalunna miinju sumimmuwa bowirtannosiho.
15 kumi kaare gobbaydi ikkitubba owaantishshi bayichi noosihu Addis Kalqoomu Konvenshiine Mereershi; 5 beeddakkota yannitte Hoteele, Restoraante, Ispoortete, boohaarshanna addi addi owaante uynannita yannitte uurrinshuwa amadatenni hala’lado mereershaati.
Saeno, mitte hige 2 kume kaameella uurrisa dandiisiissannoti base “Paarkiinge” noosi. Lemi Paarkenna Diilallote Doogo ledo suwise xaadisannohu hala’ladu safote latishshino mereershu ledo amadisiisame jeefamate aana leellanno.
Kunino miinja baqqi assannoha, hala’lado loosu kaayyo kalaqannoha ikkasinni sainohunni wosinu daanno woyte mitte shettono nookkiha baalanta owaantubba mitte basera afidhanno gede dandiisiisannoho.
Xaphoomu Ministirchi Abiy Ahimed (Dr) mereersha maassi’re fani yannara saysino sokkanni; Addis Kalqoomu Konvenshiine Mereershi, gobbanke jajjabba konforaansubbanna reqeccuwa harisate dandiisiisannoho. Umisenni loosse leellishshannota; konninni, lawishsha ikka dandiitanno gobba ikkase leellishannota egensiisino.
Addis Ababu koriderete latishsha murci’ne hanafankenni jawa guma abbinoommo yiinohu Xaphoomu Ministirchi; Itophiyu su’ma kalqoomu deerrinni gotti assinoha ikkasi coyi’rino.
Addis Kalqoomu Konvenshiine Mereershi konni gumira mitto xawishsha ikkasi kule; daddalu soorro assinannisiha, hedo soorri’nannihanna boowirsi’nanniha hattono Itophiyu kalqoomu dipiloomaase loossannoha ikkannota coyi’rino.
Itophiyu xaaddannose jifo maala’lisanno garinni sa’’atenni sumudase wortanni no yiinohu xaphoomu ministirichi; mereershu Afrika xaadissanno konforaansubbanna daddalu reqeccuwa harinsanniha ikkinotanna muli yannarano kalqoomunniti mannu kalaqino huwatto konforaansenna reqecco harinsanniha ikkasi xawisino.
Itophiyu sa’u dirrara maareekkitinoti latishshu loossa umise huwanyonninna oosose hixamanyenni Afriku lawishsha ikka dandiitannota leellishshinore ikkansa xawise; tenneno 38ki Afriku Mittimma massagaanote songo beeqqitino massagaano lendeenna farcidhinoha ikkasi leellishino.
Itophiyu bikka xaano garunni dixawinsoommo yiinohu Xaphoomu Ministirchi; Itophiyu jawu aamanshi noose gobba ikkasenni konni bikkinni jawaante loosa hasiissannota hegersino. Mootimmate loosu sooreeyyeno ikkito daga olloha, loosanna jawaata hattono latishshu yannara xaaddanno jifubba dandee loosa hasiissannonsata egensiisino.
Itophiyu lophote ha’rinsho timote iillishatenna Afriku jireenyi lawishsha assate murci’ne loosa hasiissannotano kulino.
Itophiyu qansooti soorrote ka’nummoro seekkinummokkinni uurrisa dandiineemmokkireeti yiinohu Xaphoomu Ministirchi; konneno, sa’u dirrara hananfoommo latishshu handaarranni gumulotenni buunxoommo yiino. Baalanti daga ajuujanke jiroo’mitaranna Itophiya soorra ikkase huwatatenni irkonsa kaajjishshe suffanno gede woshshatto shiqishino.
Addis Kalqoomu Konvenshiine Mereershi 40 hekitaare baatto aana ofollinoha ikkanna; mittu mittunku 3000-4000kumi geeshshi manna amadate dhuki noonsare 2 jajjabba harubba (addaraashuwa), 8 shiimmaaddanna mereerima gambooshshu harubba xaphoomunni 10 kume manna owaantissanno harubba amadinoho.
Gazeexu Odeessaanchinni
Bakkalcho Ammajje 27, 2017 M.D
