Tittiro
Sidaamu daga kalaqamu egennonsanni horonsidhanno kiirre gundannikki ha’nuru budu amanyooti giddonni Affini budi mittoho. Affini budillaancho araarunna farco uyinanni amanyooteeti. Cimeeyye songo ofolte mimmitu ledo macciishshamatenni giwammoha araarsitanno;suwashsho farco uyitanno; Affinotenni farco dishokkinshanni; halaalu aana safamino ha’nura amanyooteeti.
Affini budu amanyooti giddosi amadino hornyubba Sidaamu dagara calla ikkikkinni gobbatenna kalqete hasiissannore ikkansa ammanatenni xaa yannara addi addi doogonni wo’manti daga affanno gede assinanni hee’noonniti addaho. Muli barrinnino konne bude xawisse leellishshannotinna jajjabba seesiqalote ogeeyyenni loosantinoti Affini filme maassante dagate shiqqino; filme gobba giddonna gobbayidi gobbuwara heedhanno Itophiyu dagawano hattonni faajjetenni daa’’atantanni no.
Kuni budillaanchu amanyooti Sidaamu daga hundinni hanaffe kalaqamu egennonsanni kiphonna gaance tirtanni keeshshitinohanna techo ilamara tareessitinoha ikkanna; xa kayinni konni amanyootira afamishsha aatenni seeru yoo amaale mine uurrinsoonni.
Tenne hajo Sidaamu qoqqowi farcote biiro annimmatenni massagganni nooha ikkanna, biirote sooreessa kalaa Mato Maaruha hasaawinsoommo.
Affini amanyoote woyi dagoomu farco yinanniti seeda dirrara dagoomu giddo keeshshino amanyoote ikkasi kulannohu sooreessu; kuni amanyooti garunni gumulamanno gede mootimma afamishsha uyite illacha tugge irkissuro batinye mitiimmubba tirannoho ;hattono yoote minnanna farcote amanyooti xiiwo ajishannoha ikkasi buuxisanno.
2016 M.D Afffini amanyooti farcote amanyootira irko ikkanno gede seeru lallawa kaajjinshoonnita kule kalaa mato Maaru; konninnino haaro tantano uurrisatenna alba noore kaajjishate, wodho fushshine Affini songo amaale mine uurrinsoonnita qummeessino.
Affini amanyoote haaro tantanonni uurrinse seeru irko aa aantete heedhannose horo xawisanni; Anfinte gede farcote amanyooti muxxete; mittu manchi farcote amanyootiwa maranno woyte ayyaayyamaancho adhe ma’ranno; duucha hinge hodhatenna baalante seeru harinshora fushshannoti woxu fulo luphiimate. Qooxeessa qooxeessaho Affini yoo mini uurra fulonna daafuro gatissanno yaanni naqqasanno.
Daga qooxeessinsara farco afidhanno gede kaayyo aannoha ikkasi xawise; wole widoonni dagoomu mittimmansa agarantinonte gedeenni hajonsa araarunni guxxitanno amanyoote ikkasi qummeessanno. Konni amanyootira irko assiniro farcote amanyooti aana leeltanno hekko ajishannoha ikkannotano buuxisino. Aantino lee aganna giddono batinye hajubba konni amanyooti widoonni gooffanno yine hendannita biirote sooreessi lede qummeessino. Kalaa Mato xawishshi garinni; Affini songo lallawunna mootimmate garinni illacha tunge loonsoonnihu umihunni Sidaamu daga hundinni haadhe dagginoha ha’nura budenna balchooma agarre aantino ilamara tareessate ikkanna; layinikunnino farcote amanyooti aana noo qarra tiranno yine hedatenniiti.
Konni alba Affini amanyootinni gumullanni hajubba borreessine amandannirenna afansha uyinoonnire di ikkitino; hattono qansootaho roso uyinannire di ikkitino yaannohu kalaa Mato; qarunni ninke looso ikkannohu Affini amanyooti umihunni Sidaamu daga jawa jiro ikkasinna konni amanyootinni qansootu owaatama dandiitannotanna woyyinoha ikkasi daafira huwanyo kalaqate yaanno.
Konne looso gumullummohu gedensaanni balanxe albi tantano gumultanno loossa buuxate. Lawishshaho; Konni albi gudumaallara afansha uyiniha ikkiro, hattenne gudumaalla agarsiisa, irko assanna labbeemme loossa loonsiro affini amanyooti farcote amayooti aana heedhannosi gummaamimma luphi assitanno yine hendannita coyi’rino.
Xaa yannara noo harinsho xawisanni; Federaalete farcote ministirchonna wolootuno halamaano uurrinshuwa afantinowa doorantino lame woraddara qixxaawo hananfoonnita kule; wole widoonni kayinni sa’u lamalara budu geerranna woroonni noo massagaanora huwanyo kalaqate bare harinsoonnita egensiisino.
Seeru farco aana luphiima qoropho assinannita huwachishannohu sooreessu; budunna balchoomu burduuqamikkinni farcote looso irkisa ikkinohura kuni loosi budu geerri uyitanno harinsho qajeelshunna hayyotenni irkisate looso hanqafannota lede xawisino. Geerru hallaale fushshiishe araara diriirate assanno harinsho qaru illachi qorichisha ikkitukkinni hegere araara karate yiinohu kalaa Mato;Affini songo farco shokkitannokki uurrinsha ikkite seerunni kaajjite uurrase luphiima horo noosetano qummeessino.
Qiddist Gezzaheny
Bakkalcho Ammajje 27, 2017 M.D
