Hawaasa:- Sidaamu qoqqowi Industirra kaajjishate looso hixamanye losanni noota xawinsi.
Qoqqowoho tenne lamala giddo assinoonn babbaxxitino hedo cu’mishiishatenna millimillote bare harinsoonniha ikkanna; Industirrate laalchubba daddalu reqeccono Masqalu xawira fannoonni.
Millimmote hasiishshi qansootu gobbate giddo laalcho horonsi’ranna laashshate aana huwanyo kalaqatenni gobbaydi doolaare soorro ajishanna Industirra Baadiyyete halashshate hende ikkinota xawinsoonni.
“Itophiyu Laashshito Ninkeno Geexi’no” yaanno adawarshinni ha’rinsoonni barera lelle hasaawa assinohu Sidaamu qoqqowi Pirezidaantichi Desta Ledamo; gobba Industirete widira reekkama hoogguro buximatenni fula ajuuja calla ikkite gattanno yiino.
Mitte lophote kaayyo calla harunsa hasi’noonni lopho abbitannokkihura hanqafaancho lopho widira reekkama doorshu nookki hajooti yaannino coyi’rino.
Pirezidaantichu ledoteno, laashshaano Industirrara dikkote xaadooshshe kalaqa hoongiro loosi’rinohu mulla ba’’anno daafira waateho dikkote xaadooshshe kaajjinshe sufisiisa hasiissannota qummeessino.
Handaaraho qoqqowu uyno illachi baxxinoha ikkasinni hasiisannore wonshatenni hixamanyine loonsanni hee’noonnitano huwachishino.
“Baadiyyete Industiralizeeshiine jeefisatenni maatete jireenyira safo tungeemmo” yaanno adawarshinni harinsoonni barera leelle sokka saysinohu Itophiyu Interpirayzete Latishshi Qaru Dayrekiterichi Allebbaachew Niguse; mootimma jeefissanni noo Industire baadiyyete halashshate Sidaamu Qoqqowi dooraminoha ikkasi xawisino.
Tennerano Hawaasinna Yirgaalame qooxeessuwa baadiyyete Industirra halashshate injo noonsare ikkansa kulino.
Tenne Inisheetiive baatto kadisiisatenna galo Industirra kaajjishate widoonni Qoqqowu mootimma leellishshanni noo kaajjadu loosi rosicho adhinanniha ikkinota kulino.
Jireenyu Paarte Sidaamu Qoqqowi Sinu Borro Mini Tantanote Handaari Sooreessi Kalaa Ashshenaafi Eeliyaasihu isi widoonni;qoqqowoho jeefinsanni hee’noonni 68 Paakeejubba giddo 8tu Industirennita ikkase Industire halashshate uynoonni darga leellishshannota ikkase xawisino.
Qoqqowu Industirete Latishshi Biiro Sooreessi Kalaa Gosaye Godaanano hattonni; Industire baadiyyete halashsha ajuunjeemmo jireenya baatto kadisiisate qara hajo ikkase xawisino.
Millimmote hasiishshi qansootu gobbate giddo laalcho horonsi’ranna laashshate aana huwanyo kalaqatenni gobbaydi doolaare soorro ajisha ikkase Biirote Sooreessi lede xawisino.
Laashshaano Industurra gobbate lophora qeechansa fultanno gede yanna yannatenni Biiro togoo huwanyo kalaqote bare qixxeessitanni keeshshase kulinohu sooreessu;amandoonni baajeettete diri giddo calla xaphooma kaapitaalensa 500 miliyoone ale borreessiissino dureeyye handaaraho bobbakkinota buuxisino. Konninni, 7 kumi ali qansootira loosu kaayyo kalaqa dandiinoonnitano kalaa Gosaye egensiisino.
Kalaa Gosaye xawishshi garinni; tini millimmo hanaffu kawa jawa soorro daggino. Gobbate giddonni 62, gobbate gobbayidinni 6 haaruudde Industirra loosu giddora ei’no. Looso uurrissinori 56 Industirra loosu giddora e’ano gede assano dandiinoonni.
Laashshaano Industirraha laashshate dhukansa 44.4% woroonni noowinni 59.5% iillinshoonni. Xaa yannara qoqqowu giddo 1 kumenna 90 shiimmaadda, 82 mereerimanna 130 jajjabba Industirra afantannotano kalaa Goosaye kulino.
Kidaane Kia
Bakkalcho Ammajje 27, 2017 M.D
