Addis Ababa:- Gobboomu deerrinni 1000 ikkitanno borreessammete merershubbara Fayda ayimmate badooshshi maareekko harisantanni hee’noonnita Gobboomu Dijitaale Ayimmate Badooshshi Pirogiraame xawissu.
Baajeettete dirinni 30 miliyoone qansootira Fayda ayimmate badooshshi kiiro iillishate mixi’noonnita kulloonni.
Gobboomu ayimmate pirogiraame komunikeeshinetenna dagate xaadooshshi sooreessi Kalaa Abeenezer Felleqe Itophiyu Pireesete Uurrinshara xawisino garinni; amandoonni baajeettete diri jeefora 30 miliyoone qansootira Fayda dijitaale ayimma badooshshi kiiro afidhanno gede assate loonsanni hee’noonni.
Addis Ababaho Fayda ayimmate badooshshi maareekko ledo amadisiisame woyyaawu baqqeenyinna maareekkate harinsho noota xawise; tayxe diro mixi’noonni kiiro iillishate hala’ladunni qoqqowubbate widoonni maareekkote looso loonsanni yiino. Ledoteno, qara qara quchumuwanni fulle baadiyyete qooxeessubbara iillate loonsanni hee’noonnita qummeessino.
Qoqqowubbate Biiro, qoqqowu gashshoottanna halamaano bissa ledo qinaawateenni 2017 baajeettete dirinni Fayda dijitaale ayimma badooshshe borreessamaano 30 miliyoone iillishate loonsanni he’noonni yiinohu Kalaa Abeenezer; gobboomu deerinni 1000 ikkitannoti maareekkote mereershubba hee’rase xawisino.
Kuri maareekkote mereershubba qarunni Eote ministere, Itiyo-telekoome, Sheemaatunna Tajete Uurinshanna Addis Ababu giddo afantanno baalante siviilete borreessonna teessaanchimmate owaante widoonni maareekkinanni hee’noonnita huwachishino.
Dagate xaadooshshi sooreessi coyi’rino garinni; xaa geeshsha noo ha’rinshonni 12 miliyoone qansooti Fayda ayimmate badooshshe afidhinoha ikkanna; 52 uurrinshuwa ledo lifixishshu xaadooshshe assatenni mannu owaante afi’ranno gede assinanni hee’noonni.
Umikki yannara ayimmate badooshshi kaarde pirogiraame hananfi woyte dagate widoonni adhamooshshu jawa ikkinokkita qaagiisse; korkaatuno woloota gobbuwante gede tekinoloojetenni irkisaminohu ayimmate kaarde amanyooti konni albaanni nookkiha ikkinohura huluullo noonkanni yaanni kaysino.
Hallanya mashalaqqe agarooshshinna owaantete iillo ledo amadisiisame dagate babbaxxitino xa’muwa noosenkanni.
Xiinxalluwa leellishshanno garinni gobbate gede 40% ale ikkitanno qansooti ayee dani ayimma kaardeno dinonsa. Togo yaa kuri mannooti ayee dani owaantewiinni xiiwantinoreeti yaate. Konni ragaannino Faydu ayimmate badooshshi kaarde kuri dagate bissa suwashsho ikkino miinju amanyootiwa e’anno gede dandiissiisannota lede xawisino.
Demmellaash Demmeqe
Bakkalcho Ammajje 20, 2017 M.D
