Addis Ababa:- Loosidhenna ce’e galtinori heeshsho woyyeessate gibrinna dijitaalete widira reekka hasiissanno yaanni Gibrinnu ministirchi Girma Amente(Dr) xawisi.
Itophiyu Gibrinnu Soorro Institiyute Gibrinnu Ministeerenna Geetisi Fawundeeshiine ledo halamatenni dijitaalete gibrinni hayyishsa (finoote kaarta) tenne lamalara faajje assitino.
Barete hasaawa assinohu Gibrinnu ministirchi Girma Amente (Dr) xawisino garinni; Itophiyu Dijitaali Itophiya 2025 hayyote mixo fushshidhe gumulote aana hosiisatenni danchu gumi maareekkamanni no. Loosidhenna ce’e galtinori heeshsho woyyeessate gibrinna dijitaalete widira soorra hasiissanno yiino.
Dijitaale gibrinni finoote kaarta angatenni afuu widira ikkinoha gibrinnu handaara dikko illachishino (commercial) gibrinni widira lossate jawu qeechi heerannosi yaanni xawisino.
Dijitaale tekinolooje baalunku gibrinnu balchoomi xaadooshshi ledo qineessa hasiissannota leellishe; konninni, loosidhenna ceidhe galtinori gibrinnu ekisteenshine, amaalete owaante, tantanamaancho dikkote mashalaqqe, womaashshu shiqqo afidhanno gedenna gibrinnu waaco iillo qorqora dandiisiisannoha ikkasi xawisino.
Itophiyaho gibrinnu handaarinni soorro abbate sanfoonnihu kuni finoote kaarti qara ajuujasi dijitaale loosidhenna ceidhe galtinore kalqate yiinohu Ministirchu; gibrinna tekinoloojetenni yannicha assa dandiinanni hanqafo amadinoho yiino.
Ministirchu xawishshi garinni; gibrinnu mashalaqqe mitte buichowa gamba assatenni gibrinnunniha albillichote raga mixiratenna gumulate finoote kaartu jawa illacha aanno.
Meelindanna Geetisi fawundeeshiinenni gibrinnu latishshi layinki dayirekterchi Abbay Kaliifa isi widoonni; finoote kaartu sagalete wowe buuxisate, loosidhe galtinorira dikkote xaadooshshe kalaqate luphiimu qeechi noosii yiino.
Finoote kaartu gumulshi aana foonqe heedhannokki gede loosidhenna ceidhe galtinori ledo baxxinohunni seennunna wedellu ledo loonsanni loosi kaajja noosita coyi’rino.
Faajje ikkinohu dijitaale gibrinni finoote kaarti dijitaale gibrinni ekisteenshiinenna amaalete owaante lopho aana illachishannoha ikkanna; loosidhenna ceidhe galtinorira baci beeqqisiisaancho, suffinonna jiroo’mitino injo kalaqate mixirinoha ikkasi xawinsoonni.
Finoote kaartu lamu gafinni tantanaminohonna lamala dirrara keeshshannota xawinsoonniha ikkanna; umikki gafi hasiissannota dijitaalete safo latishsha ijaaratenni gibrinnu giddo leellitannota qara mitiimmubba tirate aana illachishinoha ikkinota leellinshoonni. Gafa lame dijitaalete dannooma lossatenna keenate hexxo noosi yinoonni.
Demmellaash Demmeqe
Bakkalcho Arfaasa 29, 2017 M.D
