Hawaasa:- Maaddeyubbatenni Nadaaje xorshidhe seerimale doogonni hirtanna cirunku ledo amandoonnire 10 kaameella Yoote minira shiqinshoonnita Sidaamu Qoqqowi Daddalunna Dikkote Latishshi Biiro xawissu.
Qoqqowu Dikkotenna Daddalu Latishshi Biiro Layinki Sooreessi Kalaa Burqa Buxxuula tuqu xaadooshshubba massagaanoranna ogeeyyera uyno xawishshinni; Nadaajete, baxxinohunni beenzinete anje kalaqantanno gede seerimale doogonni xorshidhe kolishsho dikkora hirtanna cirunku ledo amandoonnire 10 kaameella Yoote minira shiqinshe gumulo agarre hee`noonnita.
Kalqete deerrinni Nadaaje lainohunni anje kalaqantinota mootimma buuxxe affe loossanni noota xawisinohu Sooreessu, tini anje hakko heedheennanni seerimale doogonni uminsa horo calla shorritanno bissa kalaqqino qarrinni xaa yannara qoqqowu deerrinni anje kalaqantinota buuxisino.
Kalaa Burqi xawishshi garinni; Laambanna beenzine gobbaydi woxi soorronni abbinanniha ikkasinni; gobbatenna Sidaami qoqqowi gede shiqqonna hasatto xaaddinokki daafira anje kalaqantino.
Qoqqowoho beenzine hasidhanno kaameellanna xexxerisuwa hattono sasu goommi baajaaje kiiro batirase mitte mitiimma ikkitinota kule; qoqqowu giddo beenzine horoonsidhanno kaameella agurranna xaphoomunni 60 kume ikkanno xexxerisi, Hawaasi quchumira callaho 7 kumi ali baajaajenna 17 kumi xexxerisi, hattono heerasi beenzinete shiqqso aana anje kalaqantanno gede jawa korkaatta ikkitinota egensiisino.
Qoqqowu deerrinni assinoonni illaallishshu xiinxallonni mittu agani giddo shiqa hasiisanno Nadaajete hasatto 8.8 miliyoone litire ikkitinota qummeesse; xaa yannara afi’nanni hee’noonnihu aganu giddo 2.5 miliyoone litire calla ikkasi mitiimma lexxitanni hadhanno gede assinota kulino.
Konnira, Biiro qarra xiinxallite hegersitino doogonni Nadaajete shiqqo lexxitanno gede assate dandiisiisanno looso loosatenni hajo la’lannonsa bissara shiqinshoonniha ikkanna; muli yanna giddo qarru tidhamanno yine agarrannita Kalaa Burqi lede qummeessino.
Abrahaam Saamueel
Bakkalcho Arfaasa 29, 2017 M.D
