Hawaasa:- Sidaamu Qoqqowi hodhishshu owaantesi yannitte assatenni handaaru mitiimmubba tirate dandiisiissanno loossa gumulantanni noota Qoqqowu Doogote Latishshinna Hodhishshu Biiro xawissu.
Biirote Sooreessi Kalaa Taammitu Taaffe xawisino garinni; dagate hodhishshi owaante yannitte assatenni handaaraho leellitanno mitiimmubba tirate dandiisiissanno loossa gumulantanni afantanno.
Owaante woraqatunni co’itte assateno elektirooniksete tikkeette qoqqowoho noo lee mannahaarrara hira hananfoonnitano xawisino.
Tini loosu ha’rinshshono manna bikku ale hogowa, hasiissannokkiha hodhishshu baatooshshe (taariife), hodhaanote rakko gatisatenna kameella qorqorate luphiima qeecha godo’litinota coyi’rino.
Hawaasanna shoole zoonnate quchumubbara hanafantinoti elekitroonikisete tikkeette hidho owaante wolootta woraddarano halashshate mixo amandoonnita Sooreessu qummeessino.
Ledotenni, Teelebirri baatooshshe gumulate dandiisiissanno lifixishsha diriirsate mixi’ne loonsanni hee’noonni yiino.
Oofaanote qajeelshi uurrinshuwa lifixishsha dijitaale assatenni ikkadda oofaano owaante aatenni tiraafikete dano ajishate illacha uyinoonnitano Kalaa Taammiru coyi’rino.
Konnirano 14 softiweere latishshi loosi gumulamanni noota qummeesse; lifixishshu handaaraho gumulantanno loossa mittu mereershinni ha’runsate dandiisanno yiino.
Owaante yannitte assa handaaraho leellitannota duucha mitiimmubba tirate dandiisiissanno yiinohu Kalaa Taammiru; softiweere daanno aganira loosu giddora eessate qixxaawo assinanni hee’noonnitano xawisino.
Hawaasi Quchumi gashshootira albi mannahaari kaa’laanchi Kalaa Gudura Gujja mannahaarunni ka’anno 21 doogote xuruurranni hodhishshu owaante uyinannita xawisino.
Mannahaaraho e-Tikkeete owaante hanafamase qaagiisse owaante hodhaano rakkotenni, taarifetenni ali ledonninna bikku ale hogowatenni gatissannota coyi’rino.
Gaazeexu Odeessaanchinni
Bakkalcho Arfaasa 29, 2017 M.D
