Addis Ababa:- Luphiimu guminni xawinsannita kaajjado paarte ijaarate murci’noonnita ikkase Jireenyu paarte egensiissu.
Baalante handaarranni hanafantinoti woyyeessote loossa kaajjishe sufisiisatenni maareekkantino seyoo luphiimu deerri widira lossate mittimmate sumiimme aana iillinoonnita leellishshino.
Paarte ‘’Qaalunni budu geeshsha’’ yaanno adawarshinni sa’u sase agannara harissinota 2ki uurrinshu songo jeefo harunsite fushshitinohu sette bixxille afi’rino uurrinshu xawishshinni; luphiimu guminni xawinsannita kaajjado paarte ijaarate murci’noonnita ikkase egensiissino.
Kaajjado, keeraanchonna gumaame paarte ijaarate sirnyi suwashsho sharro xa’mannoha ikkasi leellishatenni paarte; paartete giddiidi dimokiraase lossatenni tantanamaancho duuchu handaari gawalo geeshsha halashshatenni lifixishshu amanyootubba roorenkanni yannisatenni paartenniha qorqorshunna akatoomu komishiinoota kaajjishate ammanammete aana iillinoonnita qummeessitino.
Xe’nenna foonqe taashshate dhuki nooseta gobboomu mootimma kakkayishshubba hedotenni massaggannotanna dagate millimillo ikkadimmatenni irkissannota kaajjado paarte kalaqate mittimmate uurrinshi aana iillinoonnitano egensiissino.
Aantino sase dirranni massagaanotenna miillate dandoonna isilanchimma qajeelshunninna suffino hasaawubbanni lossatenni hedotenni aleenni gumulotenni jireenya ikkitinore uyinoonninsa sokko gumaamimmatenni gumultanni dagate heeshsho soorritannore; loosunna teessote qooxeessinsara kaajjadu akatinna danchu akatoomi xawishsha ikkitinore, Itophiyu haqee halaale assitanno massagaanonna miilla kalaqatenni dandootenni soorrote motore ikkitanno gede assatenni luphiimu guminni xawinsannita kaajjado paarte ijaarate loossannota leellishshino.
Uurrinshuwate ijaarshi seyoo gumaame gobboomu mootimma ijaarshira hasiisannoha ikkasi leellishatenni; dimokiraase uurrinshatenna dagate bude assatenni gobbate mootimma adhamooshshe buuxisate leellano loosi widira e’noonnitano xawinsoonni.
Hananfoonnita uurrinshuwate woyyeesso handaaru handaarunkunninna deerru deerrunkunni kaajjishe sufisiisanna co’itte, guutanna ikkadda uurrinshuwa batisatenni gobbate mootimma ijaarshi looso kaajjadu xinti aana uurrisate; kaajjado dimokiraasicha bude kalaqate hururante loossannoha ikkasino paarte xawishshisenni egensiissino.
Paarte massagganno mootimma sa’u sase dirranni babbaxxitinota dimokiraasete uurrinshuwanna gobbate hobbaatenna dannooma agartanno uurrinshuwa wolqa, dandoonna tekinolooje horonsirate bude luphiimu deerri widira reekkatenni gobbate dannoomanna gashshootu mittimma agarsiisate naandanni guma borreessiisase songo seyootenni la’inoha ikkasino leellinshoonni.
Uurrinshuwa baalanka woyte ammansiissannota gobbate wonqonna wolqa ikkite ijaarantanno gedenna wolaphonsa agarante suffanno gede paarte wo’ma huuronni irkissinotano egensiissino.
Daganniti farco afi’rate qoosso buuxisantanno gede farcote amanyoote yannicha assa, ogeeyye kalaqate, lifixanna ammansiissanno owaante uyinanni gede assate, Yooaanote wolaphonna xa’mamme bikkunni buuxate loossa gumulantanno gede cincotenni sharrantannotano leellishshino.
Miinju suffino wolqa halashshitanno haaruudde handaarra widira sa’annonna harunsitinota kalaqote miinja kaachishshannota ikkitanno gede gumaamimmatenni sharramate songote sumuu yinoonnita; suffinota latishshu fayinaanse amanyoote kalaqatenni gobba liqoote hekkowiinni agursiisanno miinja ijaarate dandiisiissanno ragubba woraseno xawissino. Eo gamba assate wolqa ledatenni dagannita lexxitanno hassatto qolate paarte cincotenni loossannoha ikkasi xawishshunni leellinshoonni.
Haanju sumudi pirogiraammanno suffino dagate budi widira sa’’anno gede; dagate beeqqono albaanni hinge massagate paarte kaajjado uurrinsha amadase; aantino sase dirranni subbinota miinju hanqafo ijaaratenni gibirinnu, Industirete, turizimete, shiilotenna dijitaale miinji latishshi ledameenna tantanaame miinja reekko abbatenni Itophiyunniha baca jireenya buuxisate dandiisanno gede paarte kalaqatenninna luphiima assatenni loossannoha ikkannotano uurrinshu xawishshinni leellinshoonni.
Dagannihu bacu hobbaatinna ayirrinyise agarameennase dagoomittete xaadooshshiseno gobbate mootimma ijaarshira qeecha baraaranno gede dandiisate, bacu jireenya buuxisannohu beeqqisiisaanchu, dagoomittete latishshi hexxo amadde cincotenni loossanni leellitannota, konne buuxisateno isilanchimma noosi rosi ilamate bacu-fullankera hasiissanno waaco ikkasi ammanantannota ikkitinotano egensiissino.
Fayyimmate handaarinni dhibba balanxe gargadhanna hakimete kaa’lonni hursa fayyimmatenna laashshaano ilamara noosi horono Jireenyu buuxe hegersannota leellishino. Bisu muso noonsari, geerru, qaaqquullu, meentu qoosso irkissanno loossa safonna woyyeesso leellansa, babbaddanno ikkitubba ba’eenna gambiimmate ikkitubba roorre afidhanno gede Paarte hururante loossanni keeshshitinotanna albirano konnenni kaajjishshe suffanno gede; baalanka woyteno keereho balaxo aatenni; kipho gatisate duuchanka woyte paartete massagaanonna miilla jawaantetenni loossanno gede raga amandoonnita uurrinshunni egensiinsoonni.
Gaazeexu Odeessaanchinni
Bakkalcho Arfaasa 29, 2017 M.D
