“Koriiderete latishshi quchuma roorenkanni daa”attotenna Investimentete dooramaancho assannoho” -Kantiiwu Mekuriya Mershaye

Hawaasa:- Hawaasi quchumira umikki gafi koriiderete latishshi loossa lee aganna giddo gumulate hixamanyine loonsanni hee’noonnita Kantiiwu Mekuriya Mershaye coyi’ri.

Hawaasi quchumi gashshooti kantiibi Mekuriya Mershaye quchumaho latishshu loossa towaanyo assitino odeessaanote gaamora xawisino garinni; quchumaho xaa yannara hananfoonnihu koriiderete latishshi loosi muli yanna giddo gumulamanno gede illachunni loonsanni hee’noonni.

5.6 kiilo meetire diwannohu umikki gafi quchumu koriiderete latishshi looso hananfinkunni lee aganna giddo gumulate hendoonnita kaysino.

Layinki gafi loosi mitti agana kiirsiisinota kule; ijaarshu looso lee aganna giddo gumulate xaa yannara barru giddo sase doyichonni hashsha barra loonsanni hee’noonnita egensiisino.

Kuni loosi hanafamasi xaa yannara loosu budi soorramanno gede assanni nootano huwachishino.

Konninni, Sawuz Ispiringinni- Hayle Riizoorte geeshsha nooha 50 hattono 40 meetire hala’linyi noose doogo ijaarrannita coyi’rino.

Membonni Riferaalete geeshsha noota 2.4 kiilo meetire koriiderete latishshi looso sa’u muli barrubba giddo IFDR Xaphoomu ministirchi Abiy Ahimed (Dr) leellinowa maassiinse owaantete fano assinoonnitano qummeessino.

Hananfoonni latishshi onte deerransa agartino dagate shumate minna, biso hayishshi’nanniwa, mannu loosino fooncho, addi addi gangalu base lede woloottano haanjanna lattino bayichubba wonshannota kulino.

Koriiderete latishshi Hawaasi quchuma roorenkanni daa”attotenna Investimentete dooramaancho assannoha ikkasino Kantiiwu Mekuriya Mershaye coyi’rino.

Xaa greshshano 2.1 biliyoone birra gaamme loonsanniha ikkanna; aantanno loossano gumulantanno yannara woxu fulo 2.6 biliyoone birra iillitara dandiitannota kaysino.

Umikki gafinni hananfoonni loossa albillichono hasiisanno garinni ijaarre gumullanni yannara quchumunniti koriiderete latishshi loossa xaphooma woxu fulo 3 biliyoone ikkitara dandiitannotano hattonni.

Kantiiwu xawishshi garinni, konni loosinni dagate beeqqono roorenkanni lexxitanninna loosu budino soorramanni daynoha ikkanna; quchuma biifado, co’ichanna baalante dagoomu bissa hee’ratenna loosi’rate injiinoha assate quchumu gashshooti illachunni loosanni afamanno.

Layinki gafi koriiderete latishshi loosi konni albaanni Hawaasi Garba eannoha lolahena bushsha gatisanno garinni loosamanni nootano hattonni.

Amsaalu Felleqe

Bakkalcho  Sadaasa 24, 2017 M.D

Recommended For You