Hawaasa:- Sidaamu qoqqowira dagate beeqqo kaajjishatenni woxu fushshaato assineenna xaa geeshsha 1.6 biliyoone birrinni ga’labbote uurrinshuwa ijaarroonnita Qoqqowu Keerunna Ga’labbote Biiro egensiissu.
Biirote sooreessi kalaa Alemaayyehu Ximootewoos bero odeessaanote uyno xawishshinni; qoqqowoho konni albaanni haammata ga’labbote uurrinshuwa poolisete owaantera ikko huluullamaano keeshshiishate injiitinokkite.
Hakkiinnino sae uurrinshubbate mittu aganinni calla 1.7 miliyoone birra kiraho fulo assinannita kulino.
Poolisete owaante uytanno borro minnaranna poolisete galtanno minnara calla diru giddo 200 miliyoone birri ale fulo ikkanni keeshshinota kaysino.
Konni kaiminni, dagate beeqqo kaajishatenninna 2 biliyoone birra womaashshu fushshaato assitanno gede hendoonnihunni xaa geeshsha 1.6 biliyoone birrinni deerransa agartino poolisete borro minnanna poolisete owaante uynanni mereershubba ijaara dandiinoonnita xawisino.
Uurrinshubba ijaara calla ikkikkinni yannitte tekinolojenni illaallissanno kaameerranna qajeeltino mannu wolqanni massagantanno garinni ijaarroonnita kaysino.
Haaruudde ijaarreenna owaante aa hanaffinori ikko gattino harancho yanna giddo ijaarsha gundanniri deerransa agartinorenna yannitte daabbo gannanni horoonsi’nanninna qooxeessahono dikkote shiqinshanni giddo eo lossi’nanni gede assinanni hee’noonnita buuxisino.
Ga’labbonna keere agarsiisa poolisetenna hobbaatu bissa looso calla ikkinokkita kaysinohu kalaa Alemaayyehu; tenne yannara Sidaami giddo ga’labbo ge’annonna duuchu handaarira hasi’nanni qoqqowo ikkanno gede dagate ledo qinaambe loosatenni ikkasi coyi’rino.
Amadisiiseno, techo gobboomu deerrinni keeru konforaanse Hawaasi quchumira harinsannita kulino.
Sidaamu qoqqowi Keerunna Ga’labbote Biiro qixxeessonni keeru konforaanse Hawaasi quchumira techo harinsoonni.
Konforaansete beeqqaano baalante qoqqowubbanni, Gargarooshshu olantonni hattono Federaalete ga’labbote bissanni daggino wosinnaati.
Beeqqaano Sidaamu qoqqowira dagoomu beeqqonni 1.6 biliyoone ale birri fulonni ijaarroonnita ga’labbote uurrinshuwa towaanyo assitino.
Amsaalu Felleqe
Bakkalcho Birra 28, 2017 M.D
