Addis Ababa:- Itophiyu Baaru furcho xa’mora taalo dawaro afi’rate noo doorsha baalanka horonsira hasiissannota xawinsi.
Hajote aana Itophiyu Pireesete Uurrinsha ledo hasaawa assinohu Sidaama Birodkasetinge Korporeeshiine (SBC) odeessaanchi Yisihaaq Fiqiru coyi’ranni; gobba shiqishshe afantanno Baaru furcho afi’rate xa’mora taalo dawaro afi’rate addi addi sumimme kalaqa doorshu gede horonsira hasiissanno yee; alba hananfoonninte gede ee adhate amuraatenna gobbuwate ledo sumimme kalaqa lawishshu gede kayisino.
kalqe galtannohu kalqoomu wayi seeri no; wayinni xaaddannori lamenna sase gobbuwa mereeronsa heedhanno sumimme garinni gumultanno. Kipho kalaqantuha ikkiro nafa kalqoomu wayi seerinna sumimmensa garinni gumultannota kaysino.
Baaru furcho noonsakki gobbuwa akati aana gobbuwa mimmitu ledo e’anno sumimme garinni gumultara dandiitanno yaanohu odeessaanchu; sheemaatunni galtannoha ikkiro kayini e’noonni sheemaati garinni hattono kalqoomu wayi seeri garinni yoo afidhannota qummeessanno.
Konni daafira assinanni hee’noonni millimmo gufisantannokkiha ikkiro sumimmetenni gumula dandiinannita kayisanno.
Tenne hajo aana Awuropu kiiro 1948 garinni Halantino mootimmuwa safidhu woyteno, Baaru furcho noonsakki gobbuwa qooxeessaho heedhanno wole gobbuwa ledo sumuu yite horonsira dandiitanno yaannohu aana faasho wortino. Konne kaima assatenni horonsirate qoosso nooe yite qotisera noo gobbuwa ledo sumimme kalaqa noose yaanno. Kuni ikka hoogiro kayinni kipho kalaqantara dandiitannota kaysanno.
Itophiyu hadhanni noo harinsho kayinni kipho kalaqantannokki gede mitto widoonni kalqoomu wayi seeri gadacha hoogirono sumimme kalaqate jawaante sufa hasiissannota huwachishanno.
Baalanti Itophiyu daga dandiitu bikkinni tini hajo dagate xa’mo ikkase tuqu xaadooshshuwara fushshite kalqete dagara egensiisanna hasaawa hasiissannonsatano qummeessino.
Korkaatuno, yaanno odeessaanchu Yisihaaqi; togo assa angansa wortara wo’naaltanno gobbuwa anga badhera qoltara dandiitannohuraati yaanno.
Gobba Baaru furcho afi’rate kaimu millimmo aana noo yanna ikkasenni konne kaimanke buuxisiisate baxxinohunni tuqu xaadooshshuwa dagate ledo halante mitte jawa haja assite yanna yannatenni kaysanna horonsira hattono ga’a ilamara loosa hasiissannota odeessaanchu lede qaagiissino.
Tini ilama waaga baatteenna aantino ilama Baaru furcho xa’mo sufisiissanno akati kalaqamara hasiisanno yaanno.
Suwashshonna shota doogonni sa’e jawa gobba ikkitinoti dino yaannohu Odeessaanchu Yisihaaqi; gobbate giddonna gobbaanni heedhannori Itophiyu daga hajote aana mootimmate qotira uurritanno gede sokkasi sayisino.
Qiddist Gezzaheny
Bakkalcho Birra 21, 2017 M.D
