Addis Ababa:- Wodiidi Itophiyi Gedeote zoonera afantannoti Dillu mereerimu agro Industire paarke umikki yannara laashshitinota 22 kume litire Abukaadote zayte gobbaydi dikkora sokkinota xawinsi.
Paarkete Siiyiz agro Industire maamari loosu harisaanchi kalaa Selemoon Geetu xawisino garinni; umikki yannara laashshinoonnita 22 kume litire zayte gobbaydi dikkora sonkoonni.
Aanteteno laashshinanni yanna halashshatenni diru giddo shooleenge Abukaadote zayte Awuropunna Ameeriku dikkuwara soya dandiinanni xaadooshshe kalanqanni hee’noonnitano kaysino.
Abukaadote zayte laalchira ledote Bunu laalcho qixxeessatenni gobbaydi dikkuwara soyaatenna saadate sagaleno laashshate loonsanni hee’noonnita egensiisino.
Laalchu gobbaydi dikkora shiqa aantetenni paarkenniha laashshate dhukanna heewisamaanchimma lossatenni sae gobbate giddo afantanno labbanno paarkubbarano dancha kakkaooshshe kalaqannota coyi’rino.
Wodiidi Itophiyi qoqqowi Industirete paarkuwa qaru loosu gumulsiisaanchi kalaa Xilahun Birhaanu isi widoonni Itophiyu odoote owaantera xawisanni; paarke yannitte tekinoloje reekkatenna loosu kaayyo kalaqate noose qeechira ledote Abukaadote zayte laalcho gobbaydi dikkora shiqisha hanafase lophotenna reekkote gafira afantannota leellishannoho yiino.
Aanteteno dhukase kaajjishidhe diru giddo 130 toone ale Abukaadote zayte laashshatenni gobbaydi dikkora sokkanno gede qinaawino wo’naalsha assinanni hee’noonnita coyi’rino.
Paarkete qansootaho kalanqoonni loosu kaayyora aleenni waacote shiqqo xaadooshshinni 3 kume ale ikkitanno qooxeessaho loosidhe galtinore horaameeyye assa dandiinoonni yiino.
Gaazeexu Odeessaanchinni
Bakkalcho Birra 21, 2017 M.D
