Addis Ababa:- Itophiyu gobboomu amaalamme komishiine qineessonni Wodiidi Itophiy qoqqowira sirnya gamba assate bare harinsanni hee’noonni.
Bareteno qoqqowoho 96 woraddanni 2 kume ali dagoomu bissa riqibbinorinna 1 kume 800 ikkitannori hajo la’annonsa bissa beeqqitanni afantanno.
Bare faajjetenni hanafisiisinohu Itophiyu amaalammete komishiine komishiinerchi Yoonaas Adaayye (Dr) coyi’ranni; gobbate gede e’noommo qarrubba giddonni fulatenna sumuu assitinokki hajubba lainohunni mimmito macciishshatenninna amaalammetenni qarrubba tidha hasiissanno yiino.
Xaaddino qarrubba gamba yine hasaawunni tirate rosicho dhaabbachishatenni dhaggetenni hawamannokkinna albillichono ilama danchummatenni qaagganno dona wodha hasiissannota huwachishino.
Qoqqowoho tenne lamalara lee barrubbara keeshshitanno bare Wolayitta Sooddo quchumira harinsanni hee’noonniha ikkanna; baxxinohunni, gobboomu amaalamme hasi’noonni garinni timo gantanno gede meentunna wedellu beeqqo luphiima qeecha afidhinotano kulloonni.
Itophiya hegersatenna hasi’nanni lopho widira reekkateno meentunna wedellu beeqqo lowontanni hasiissannota beeqqaano kayissinoha ikkanna; gobbate eltanno hedubbansano filiqqissanni afantanno.
Bareteno albillicho gobbate hasiissanno hedonsa aatenninna dagoomitte, miinjunna poletiku handaarranni gutunni torbatenna gobboomitte hajora agarranninsa qeecha fulate kaayyo afi’ransanni hagiirraamma ikkitinota beeqqaano xawissino.
Gaazeexu Odeessaanchinni
Bakkalcho Birra 21, 2017 M.D
