18ki Federaaletenna Qoqqowubbate Seejjote Minna Komishiine gutu songo sa`u lamalara Hawaasa harinsoonni.
Barraho, Federaalete Seejjote Minna diru mixo gumulo shiqqeenna hasaawa assinoonniha ikkanna; bare massaginohu Federaalete Seejjote Mini Komishiine Komishiinerich Jeneraal Yenusi Muluhu, seejjote minna muli yanna kawa seejjamaanote qoosso agaratenna agarsiisate, hasiisannonsa uduunne shiqishate, qajeelshatenni seejjamaanote injiino baycho kalaqate widoonni luphi yiino gumi maareekkamanni daynota huwachishino.
Komishiinerichu Jeneraal Yenusi, seejjote minna soorrote albaanni seejjamaanote mannihimmate qoossonsa kiso jawu garinni noota xawise; xa kayinni qoossonsa agaratenna agarsiisatenni sa`ne seejjamaanote buqqee soorrine qajeelshine laashshaano assatenninna uurrinshuwa latishshaame ikkitanno gede soorrate looso loonsanni hee`noonnita buuxisino.
Sidaamu Qoqqowi Seejjote Minna Komishiine Komishiinerichi Kontamo Burqihu isi widoonni, Seejjote minnahu qaru loosi yoote mininni gumulo afidhe daggino seejjamaano haa`re qajeelshe tii”u soorro daggano gede assatenni hattono qorichansa gudde fultanno yannara dagoomunniwa karsantanno woyte qarra kalaqqannore ikkitukkinni latishaamma ikkitanno gede loosa ikkinota qummeesse;seejjote minna qajeelshunna latishshu mereersha assate loonsanni hee`noonnita xawisino.
Itophiyu Farcote Ministeere Dieetichi Kalaa Umudu Ujuluhu, seejjote minna ministeerete hundaanni woshshantanno uurrinshuwa ikkitanna, seejjamaanote injiitinota assate hattono hasiisanno uduunni shiqanno dooggo kalqatenna woxunninna qajeelshunni irkissanno mootimmaame ikkitinokki uurrinshuwa widoonni irko assinannita kule; qoqqowubbano seejjote minna yanneessate uminsa dilaalansano fula hasiissannonsa yee qaagiissino.
Battalate beeqqaano ikkitinori qoqqowubbate komishiinertooti, seejjote minna yanna yannatenni soorrantanni dagginota kulte; kayinnilla, seejjamaano gatona yinanni amanyooti mitto dana ikka hooga, mitu mitu fula hasiissinokki seejjamaano muishshunni gatona yaate kaayyo afi`ra, buqqeete aana qarru noo seejjmaano massine buunxanni baychi woy hospitaale aja, seejjmaanote uurrinsha giddo eessa hasiissannokki uduunne cuube, arrado, caate, moobaylenna wolootta hoolloonnire eessa, hattono seejjamaanote sagalete fajjinoonni woxi qoqqowu qoqqowunni baxxannoha ikkasi woyyaawa hasiisanno hajubba ikkitinota kayissino.
Tenne ka`ino hajubba aana dawaro qolinohu, Itophiyu Farcote Ministeere Dieetichi, komishiinereootu kayissino hajubba halaalancho ikkitinota xawise; ministeere dagganno yannara hasaabbe ka`ino hajubba aana woyyaawa hasiissannore woyeessatenni mitiimmuwano tirate looso loossanno; hattono seejjote minna giddo noo loossa wodhotenni mitto dana afidhanno gede assate widoonnino loossannota coy`rino.
Hakkiini sufatenni, Sidaamunna Oromiyu Qoqqowira dancha gade ikkino loosi ripoorte beeqqaanote shiqinshoonniha ikkanna, minu hasaawa togooha dancha gade baalanka baycho iillisha hasiissanno yite hedonsa wortino.
Qoleno Federaaalenna Qoqqowubbate daggino massagaano Itophiyu Mannihimmate Qoosso Komihiine Komishiinerichi Miizaanu Abaate (Dr) ledo Hawaasi Mereershi Seeru Seejjo uurrinshanna seejjamaanote qoosso agarate widoonni loonsoonni loossa lainohunni towaanyo assitino.
Hawaasi Seeru Seejjo mereershi seejjamaanote qoosso agaratenna agarsiisate widoonni woleho lawishsha ikkanno looso loosanni noota Miizaanu Abbate (Dr) nna wolootta massagaano xawissino.
Abrahaam Saamueel
Bakkalcho Wocawaaro 30, 2017 M.D
