– Xibbuunni 8.4 anga lopho borreessiisate wo`naalsha assinanni
– Waagu lexxo qorqorate illacha assinanni
– 4.3 miliyoone loosu kaayyo kalanqanni
Addis Ababa:- 2017 baajeettete dirinni xibbuunni 8.4 anga lopho borreessiisate wo`naalsha assinannita, waagu lexxo qorqorate illacha assinannitanna 4.3 miliyoone qansootira loosu kaayyo kalaqantannota pirezidaant Taayye Atsiqesillaase xawisi.
Tenne lamala giddo harinsoonni 6ki dagate riqiwamaano Amaale mininna Federeeshiinete amaale mini 4ki diri loosu wogga aana pirezidaantichu Taayye Atsiqesillaase lamunku amaale minna faajjetenni fane looso hanafisiisino.
Pirezidaantichi assino fanote hasaawinnino 2017 baajeettete dirinni illacha assinanni yiino hajubba mereerinni diilallote gadi soorronni gufamannokkiha gibrinnu handaara kalaqa balaxo uynote.
Gumuloteno gorsu mekanayizeeshiine loossa kaajjitanno gede assatenni waacote shiqisho ledo amadisiisaminohunni baxxinohunni gobbaydi soorronna liiqote shiqisho qarra sufotenni tirate loosu aana hosiinsoonniti woxu poolise gumaamimma buuxate loosi illacha assinanni hajubbanni mitto ikkinota pirezidaantichu Taayye buuxisino.
Baxxinohunni konistiraakishiinete handaara massagate, gashshate kaajjado uurrinshu dhuka kalaqate wo`naalsha assinanni, investimente jawaachishanno garinni qooxeessa woyyeessate looso loonsannino yiino.
Pirezidaantichu xawishshi garinni; owaantete handaarinni leeltannota hala`lado doogimalimma uurrinshu loosi widira eessatenni, fayinaansete handaarinni sa`u dirrara leellino kakkaooshshe halashshatenninna sufisatenni saeno kaajjado dijitaalete amanyooti widira eessatenni xibbuunni 8.4 anga ikkonomete lopho borreessiisate wo`naalsha assinanni.
Gobbate giddo e“o lossate taakisete amanyooti giddira e`inokkire eessatenni, haruudde taakisete danubba loosu aana hosiisatenni, taakisete massagooshshi amanyoote yannoonsatenninna taakise gamba assatenni, fultanno fulo gumaame assatenni, taakisete amanyooteno qoqqowubbate dirrisatenni mootimmate e“o 1.5 tiriiliyoone iillishate mixi`noonnita buuxisino.
Kaajjado fiskaalete poolise gumulatenni, laalchonna laalchimma lossatenni, shiqishote ragaanni noo mitiimmubba tiratenni laashshaanonna horaameeyye xaadissannota dikkote safote latishshubba halashshatenninna loosu amanyootubba diriirsatenni waagu lexxo qorqorate wo`naalsha assinannitano egensiisino.
Haruudde gobbaydi laalchubba mitteenni hanqafatenni hattono ledote dikkote iillubba halashshatenni, bura laalchubba soyaantenni roore hornya lende soyaatenni, gobbaydi gobbuwa dureeyye handaaru giddora e“annoy gede injaanno akata kalaqatenni, handaaru godo`laano jawaachishate assinannire kaajjishatenni gobbaydi shaqaxi daddalinni 5 biliyoone doolaare ale afirate qara looso gumullannitano xawisino.
Tayxe gobbaydi dureeyyera tirfensa gobbatenni fushshate xa`mo dawaro uynanni yiinohu pirezidaantichu Taayye; investimentensarano wowenna golo uynannita buuxisino.
Gobbaydita suwashsho investimente lossatennino 5 biliyoone doolaare ale iillishate loonsanni yiino.
Hala`ladonna sufote loosu kaayyo kalaqatenni gobboomu deerrinni loosonna loosaasine garunni xaadisatenni hattono dikko hasidhanno dandoo wonshitanno loosaasine shiqishatenni hanafantino loossa kaajjitannota huwachishino.
Manaadda interpirayizubba halashshatenni wedellaho loosu aana illachishino qajeelsha aatenninna looso kalaqqanno ilama kalaqate loonsanni, gobbaydi gobbuwa loosu bobbaasono islanchimmanna qorqorsha lossatenni biheeraawe ayimmate xawishshi ledo loosamanno gede assinanni yiino.
Gumulshubbano tayxe 4.3 miliyoone qansootira loosu kaayyo kalaqantanno gedenna konni giddonni 700 kume ikkannohu gobbaydi gobbuwara kalanqanni loosu kaayyo ikkannotano buuxisino.
Abbebech Maatewoos
Bakkalcho Wocawaaro 30, 2017 M.D
