Bishooftu:- Gomichunni diwamino gordi xawino. Arrishshono warri yite fultino. Hawadi yannano xaate sa’ino. Xeenuno baatto shaqqishe latise harino. Adalchuno baatto akkimale diwino. Hekki yite wo’mitino xashshuwa xaate xe”a hanaffino. Kuni baalu ikkannohu Itophiyaho wocawaaru agani giddooti.
Konni aganira gobbate afantanno haammata daganna dagoomma diru soorronna wolootta ayyaanna danchu garinni ayirrissino. Wacawaaru agani giddo ayirrinsanni ayyaanna mereerinni Irreechu ayyaani mittoho. Ninkeno Irreechu luphiimu garinni ayirrisamanno bayichubbanni mitto ikkinnowa Bishooftu afammoommo.
Bishooftu ayirrinsannihu Hora Arsedi Irreechu ayyaani luphiima kiiro noonsa mannooti afantinowa danchu garinni ayirrisamino. Ayyaanu aanano babbaxxitino gobbate kifillanni dagginonna budu uddannanni biiffino Abba Gadooti, Hadesinqootu, gobbate geerrinna wedellu hattono qaaqquullu beeqqitino.
Galchimi Guji zoonera Hayyo Abbaagada ikkinohu Ebba Deema galchimi Gujete zoonenni dayee Hora Arsedi Irreechu ayyaana beeqqanna afi’nesi ayyaanu ayirrishshi daafira macciishshaminosire xa’minoommosi.
Abbaagadu xawishshi garinni; Irreechu mittimmanna baxillu leellannonna kaaliiqirano galatu shiqanno ayyaanaati.
Babbaxxitino daganni fultino beeqqaano badooshshiweelo baxillunninna mittimmatenni gutunni ikkatenni kaaliiqa galattanna la”asinni hagiidhinotano coyi’rino.
Ayyaanu Oromote daganni hawado sayisino kaaliiqira bayira galata shiqinshanni ayyaana ikkinotano xawisino.
Gaamote zoone Arbaamincetenni dayinohu kalaa Wendiifirawu Ketema isi widoonni; wolootta daganna dagoomma babbaxxitino budu uddannanni biiffe dagginoha ikkasinni tayixe Irreechi baxxinoha ikkinota coyi`rino.
Irreechu keere mittimmanna galata duduwanno ayyaana ikkasinni kuni balchoomi kaajje sufa noositano xawisino.
Togoo ayyaanna qoqqowunnino sa”e gobboomu deerrinni ayirrisanna sufisa hasiissannota xawisinohu kalaa Wendiifirawu; daganna dagooma xaadisate ragaanni luphiimu qeechi noosi balchooma ikkinota coyi`rino.
Jaallase ledo mittu garita budu uddanna uddidhe ayirrissanna xaandoommoti wedellicho Heelen Kebbede Adaamu quchuminni dagginota xawisse; Irreechu ayyaani Oromote gadanni baxxino bayicho uyinanninna baxillunna mittimma leeltanno amanyoote ikkinota coyidhino.
Irreechu ayyaani wolootta daga ledo baxillunninna mittimmatenni hee`nanni gara rosiisannoho yitannoti wedellicho Heeleni; diru dirunkunni konne ayyaana quqquxxotenni agartannota xawissino.
Ayyaanu keerenna baxille rosiisannoha ikkasinni Itophiyu daga mittimmatenni ayirrisa hasiissannonsata coyidhino. Hattono ayyaanu aana leeltino mittimma kaajjite sufa noose yitino.
Wedellichu Leggese Dursa isi widoonni; ayyaanu aana dukkisamate Sabbatunni dayinota coyi`rino. Irreechu hawadi yanna sa`anno woyte maate maatenniwa xaaddannoha ikkasinni baxxitino macciishshamme kalaqannosita xawisino.
Wole wedellicho Boontu dirre Baalenni dagginota xawissino. Tayxe Irreechu ayyaani baxxinoha ikkasi xawise; amma’notenna dagate bodooshshi nookkiha Oromote daga wolootta dagoomma ledo mittimmatenni ayirrissanno ayyaana ikkinota xawissino.
Wedellicho Boontu; wedellu konne bude agarte sufisiisa noonsatano qummeessitino.
Hawaasinni dagginoti wedellicho Tizzita Yooseef ise widoonni; konne ayyaana ayirrisate daasennino hagiirraame ikkase xawise; konni albaanni Hora Finfinne onte higge dagge ayirrissinotanna tayxe qole umi yannara Bishooftu Hora Harsede ayirrisate kaayyo afidhinota coyidhino.
Itophiyu daga baalanti konne ayyaana mittimmatenni ayirrisa hasiissannonsano yitino.
Tayxehu Irreechu ayyaani “Irreecha budinke haaroo`mara” yaanno massagote uminni Hora Finfinnenna Hora Harsedi danchu garinni ayirrisaminoti qaangannite.
Abbebech Maatewoos
Bakkalcho Wocawaaro 30, 2017 M.D
