Hawaasa: Hawaasi Yuniversite daanno diro umose gashshitannota ikkate dandeessitannoseta balaxote qixxaawo assitanni noota Yuniversitennihu akadaamike hajubba layinki pirezidaantichi xawisi.
Yuniversitennihu akadaamikete hajubba layinki pirezidaantichi Injiiner Fissiha Geetaachew (PhD) Itophiyu Odoote Owaantera xawisanni; gobboomu deerrinni xiinxallotenna fullankete mereersha ikkitanno gedenna umonsa dandiitanno gede filloonni jajjabba rosu uurrinshubba giddo Hawaasi Yuniversite mittete.
Ikkinohurano Yuniversite dagganno yannara umose dandiitinota ikkitanno wote loossannota onte golla badde balaxote qixxaawo looso hanaffinota coyi’rino.
‘’Gibirinnunna Heeshshote Sayinse, Fayyimmate Sayinsenna Hikkiminna, Fiizikaale Sayinse, Dagoomu Sayinsenna Hiyumaanite hattono Rosiisaanote Qajeelshi bandoonnire onte gollaati’’ yaanni xawisino.
Kuri onte gollanni ikkadonna xiinxallaancho qansicha kalaqate dandiissannota balaxote qixxaawo loossa loosantanni noota egensiisino.
Kuri gollanni rosu biddissi woyyeesso, batidhinota loosu sinna mittowa gamba assanna rosu biddissuwa qixxeessate loosi loosamannota coyi’rino.
Golla badate qotira roso dijitaaletenni irkinse aate, maxaaffate mine heedhannota elektirooniksete maxaaffa duuno ledatenna rosaanono noowa heedhenni horonsi’ra dandiitanno gede assannonsahu qineessote latishshi qixxaaawinota xawisino. Rosiisaano roso viidiyote misilenni irkisse aa dandiitanno ogimma heedhannonsa gede assate Arizoona Isteeti Yuniversite ledo kaa’lamatenni 400 rosiisaanora dhaaddo (on line) qajeelsha uyinoonnitano layinki pirezidaantichi kulino.
Konnirano yuniversitete wo’mu uduunni noosihu malti miidiyu situdiyo (multi media studio) uurrisatenni wo’ma qixxaawo assinoonnita xawisino.
Konni rosu dirinni Yuniversite umi, layinkinna sayikki digire rosi pirograamenni rosaano adhite rosiisate qixxaawo guddinota layinki pirezidaantichi amadisiise xawisino.
Rosu dirira 267 rosu daninni rosaano adhate qixxaawansanna kuri rosu danubba giddonni xibbuunni 35 anga ikkitannori balaxote maassonni aamantanno rosu dannubba ikkitinota huwachishino.
Injiiner Fissiha (PhD) xawissanni; Yuniversitete rosu yanna tantano yoo garinni rosanna rosiisate loosi Wocawaaro 22, 2017 MDni hanafamanno.
Yuniversite rosu isilaanchimmara uyitino illachi garinni gumu leellinota coyiranni; layinki pirezidaantichi, konnirano sai diro maassiinsoonni rosaano giddonni xibbunni 90 anga geeggote/ fulote fonqolo sa’’ansa leellishshannota qummi assino.
Gaazeexu odeessaanchinni
Bakkalcho Wocawaaro 16, 2017 M.D Hamuse
