Addis Ababa: Niyu-Yorkete harinsanni he’noonniti 79kiti Halamaancho Mootimma xaphoomu songo qara borreessaancho ikkinohu Antoniyo Gutereezi Inivetivi ikkinohunna 140 sa’annori gobbate gashshaano beeqqo assitannoti dagganno yanna songo harinsoonni.
Tenne songora gobbayidi hajo ministirchi ayirradu Ambasaader Taayye Atsiqesillaasenni massagantino soqqamaanote gaamo beeqqqo assitanni no.
Songote ayirradu ministirchi macciishshiishino hasaawinni Halamaancho Mootimma Uurrinsha Adawu amaale mini woyyeesso afrikunnita halaalaancho riqiwaanchimma buuxisiisino garinni harisama nooseta xa’mino.
Amaalete mine woyyeessate assinanni milimillo Afriku riqiwaanchimma beeqqqo baalante keenonni huwachishshe amaddinota ikka hasiissannoseta Ambasaader Taayye xa’mino.
Sumumme baalanta gobbuwa taashshe la’’annoha yanna shaartannosikkiha Halantino Mootimmaha Hanafote Chaartere qorxitukkinni loosu aana hossanno gede assate umisi widiidi qeecha fulanno yaanni Ambasaader Taayye hexxosi xawisino.
Dagganno yanna songora duucha hanqaffino dipilomaase amanyooti woyyeesso assate ilamate mittikki yaanna kaayyo ikkitanno yine agarranni songo sanade 143 aleenni ikkitanno gobbuwa sumuu yitino.
Ambasaader Taayye; tini sumuumme hegere lopho mixo maareekkisiisate assinanni wo’naalshi aana leellitanno foonqe taashshate jawu qeechi heerannoseta kulino.
Ministirchu gobbuwa buxima hunate assitanno wo’naalshi uminsa poolise hanqafo doorshi garinni kaajjado irko assinanninsa gedenna hajote balaxote illachanna poletiku illachi heerasi gede xa’mino. Itophiyu songote sumuumme afidhino ‘’Pact for the Future, Declaration on Future Generations, Global Digital Compact’’ amaalamme harinsho aana beeqqo assitanni keeshshitino.
Sanade sumuummete iillase kalqete deerrinni jawa buxima, hude, ayyarete budi soorro, bushu gaanci, dhibbu taraawonna haaro tekinolooje ledo amadante daggano jifo batidhanni noo yannara mittimmatenni dawaronna tiro aate kaayyo kalaqqannota ammannanni.
Songote qote qoteho Ambaasaadder Taayye, Ameeriku gobba hajo ministerera Afiriku hajo kaa’lamaancho ministeritte ledo hasaawino.
Niwuyorkete assinanni hee’noonni 79ki Halantino Mootimmuwa xaphoomu songo qote, Ameeriku Gobba Hajo Ministerera Afiriku Hajo Kaa’lamaancho Ministeritte Mool Fii ledo gutu illacha hasidhanno hajubba aana torbitino.
Ministerichu Itiyophiyunna Ameeriku mereero kaajjadu xaadooshshi noota xawise;aanteteno gutu illacha hasidhanno hajubbara sufino hasaawa hasidhannota xawisino.
Ambasaadder Taayye Kaa’lamaancho Ministerittera Afiriku Buudi yannitte hajubba aana xawishsha uyi yannara roorenkanni Itophiyu qachaho sufamino keerinna ga’labbora illachiishshe loossanni no yiino.
Gaazeexu odeessaanchinni
Bakkalcho Wocawaaro 16, 2017 M.D Hamuse
