Addis Abeba:- Jiroo’mitino Itophiya kalaqate massagaano ayee yannannino roore owaataanchu gashshaanchi mannimma uddidhe gumimmatenni loossanno gede Jirreenyu Paarte Pirezidaantichinna IFDR Xaphoomu Ministirchi Abiy Ahimed (D/r) xawisi.
Jireenyu paarte sa’u 12 barrubbara Adaamaho assinoonni gashshaanote dhuku kaajjishshi qajeelshshi barera paartete pirezidaantichi Abiy Ahimed (D/r) uyino faashonni jeefamino.
Xaphoomu Ministirchi Abiy Ahimed (D/r) qajeelshu goofimarchira uyino faashonni xawisanni; gobboomunnita hulluuqate buussa jawa halammenninna hayyonni seyoote iillishatenni jiroo’mitino Itophiya kalaqate gashshaano ayee yannannino roore owaataanchu gashshaanchi akata amadde gumimmatenni loosa hasiissannonsa.
Paarte ‘’Hajuujjate dhuki mittimmate lophora’’ yitanno qara hedonni qoqqowubbatenni, quchummate gashshootinna federaalete uurrinshubbanni daggino lamu kumi aleenni ikkitanno jajjabba gashshaano, ga’a Itophiyi jireenya buuxisate ilamannita albillicho kaayyo injiitinotanna seekkinota assa dandiissanno poletiku, dagoomittenna ikonoomete horo afidhino hedo aana qajeelsha uyiino yiino.
Qajeelshu gashshootu beeqqaano yannansa garunni horonsidhe dagate qarra deerru deerrunkunni tiratenni leellitanno mittimmanni Itophiyu aliidimma buuxisate qajeelshunni ikkado hedo afidhinotanna ga’a Itophiya loosa dandiissanno hedo cu’midhino qajeelsha ikkasi xawisino.
Qajeelshuno gobba soorrannoha, jiro kalaqannoha ikkasinni, gobbate deerrinni baalante qoqqowubbara, quchummatenna federaalete uurrinshubbara noori jajjabba gashshaano hatonni paartete sokko aana ikkado hedo amadatenni woyyaawino guma abbitanno gede ikkannonsata xawisanno.
Massagaanchimma aamama, shaqqille, mixo maareekkisiisate cinco xa’mitannota qummi asse; jajjabba gashshaanono adhitino qajeelshi massagote qulfe amanyoottanna akatta garunni hegersita gede assinoha ikkasinni wiinamunna mittimmate soorro maareekkisiisate dhuka kalaqanno yaanni xawisino.
Qajeelshaho ajuujjanna asso seekkate kaa’litanno dandoonna assote hayyo aana illachishshino hedo, dagate heyyeeyyamanninna kaa’lonni loosate wolqa, egennotenni massagantanno woyyaambe kaajjishate hasiissanno akkatta aana loosatenna adawu qarra wo’mu keerira sayissanno harinshonna gashshootu akatooma lainohunninna amdantino hajubba aana borro shiqqeenna hala’lado hasaawa harinsoonni.
Gaazeexu odeessaanchinni
Bakkalcho Wocawaaro 16, 2017 M.D Hamuse
