Addis Ababa:- 2017 soorrannonkeha ikkikkinni soorrineemmo diro ikkaraati halcho’ya yaanni Xaphoomu ministirchi Abiy Ahimed (Dr) dancha halchosi xawisino.
Haroo diru soorro ayyaana laise uyino xawishshinni,hawalle 2017 diru soorro Inquxaaxaashi ayyaanira iillishi’ne yiinohu xaphoomu ministirichi Abiy Ahimed (Dr); diru kaayyote; Diro horonsi’ra kayinni gumaho. Diro kaaliiqi baalunkura taalunni uyinonke. Badooshshu kalaqamannohu dirunni loosatenninna loosa hoogatenniiti. Dhaggenke giddo naaxxineemmo gafubba no yaanni xawisino.
Heeshshonke giddono hagiirsiissanno yannuwa no. Hakkuri gafubbanna yannuwa wole coye dikkitino. Uyinoonninkeha diru kaayyo garunni horoonsi’ne loonsoommo yannuwaatino yaatenni guwursino.
Ninke hasi’nono hasi’ra hoongono diru soorramanno. Yanna albira calla hadhanno maashineetina. Ayino diuurrisannose, ragano disoorrisiisannose. Dandiinannihu yanna horonsi’ra callaati. “Hawadu baatto loosi’re galino cee’maaleessira yaaddo, bilchaatu baatto loosi’re galinohura maaronniho” yinanni.
Maaronna yaaddo xeenuwiinni daggannota ikkitukkinni; baatto loosidhe galtinori qixxaawonna loosunni afi’nannite. Cee’maaleessu baatto loosi’re galinohu aana diru soorramannosi; jawaatu baatto loosi’re galinohu kayinni diro umisinni soorranno yaanniiti sokkasinni xawisino.
2016 Itophiyaho maa gumulloommo? 2017 Itophiyaho maa qixxeessinoommo? Kuri xa’mubba dawaro diru soorramme tiro soorritanno. Diru soorramanninke noonso diro soorrinanniiti hee’noommohu? Yitannota leellishannonke. Itophiyu diru soorrannase baca dirro heedhino. Sa”e sa”e qole jawaantetenninna kaajjillunni diro soorrite egentino. Diru soorrannonke woyte, Ilaalunni boqame dirrino kinchi gede, hendoommo widira ikkikkinni hasi’rino widiraati massannonkehu yaatenni diro ragunni horoonsi’ra busulle ikkitinotano xawisino.
2017 soorrannonkeha ikkikkinni soorrineemmo diro ikkannonke gedeeti hasatto’ya yiinohu Abiy Ahimed Dr; Mixonke gumulle; pirojekitubbanke yannatenninna isilanchimmatenni gunde; gaancubbanke hasaawunni tirre; seeda sanna hiiqqammenke amaallammetenninna reekkote farconni sissine; haammaturinni meessaneete dandiine; rifoormuwanke guuta ikkino garinni gumulle; soorrineemmo diro ikkanno gedeeti halcho’ya yiino; sokkasinni.
2017 Itophiyu dhaggenni kullanni diro assate qixxaambo. Sannate asalenke shallangeemmoha; keeshshitino madanke xagisi’neemmoha; sannate halchonke safo amadisiinseemmoha; dhaggete kaameeli wirsaanchonna maarshe hasi’nummo widira qolleemmo diro assate ka’no yaannino guwursino.
Albillicho dagganno oosonke; “Tini dhagge loosantinohu, techonni meikki diro 2017ni” yitanno gede assino yaanniiti huwachishinohu.
Amadisiiseno, dambalunninna hombobbolattete giddoonni maala’lissanno loossa loonseemmo gede fajjino Kaaliiqi techono ledonke no. Ga’ano ledonke no. loosa ninkete gumula Isite. Ninke ka’nummoro diro soorrineemmo gede Isi kaa’lannonke yee; wirro hawalle 2017 diru soorro ayyaani Inquxaaxxashira iillishi’ne. Itophiyu oosose hixamanyinni ayirrisante hegerera heedho! Kaaliiqi Itophiyanna dagase maassi’ro! Yaanniiti lede sokkasi saysinohu.
Gaazeexu Odeessaanchinni
Bakkalcho Wocawaaro 2, 2017 M.D
