Sa’u boode dirrara albaanni mootimma babbaxxitino qooxeessubbara hanaffino pirojekitubba loosi addi addi korkaattanni gufi’ranna daganniti latate hasatto halcho calla ikkite keeshshitinonkanni.
Soorrote kawa kayinni gobboomu deerrinni babbaxxitino qooxeessubbara loosantanni noo pirojekitubba yinoonni yannanni gumulantanni dagoomaho horo uytanno gede assinanni hee’noonni.
Sidaamu qoqqowirano xaa yannara loosantanni nooti latishshu loossa mootimma amaddino mixonna illachi kaajjado ikkasinni duuchunku handaarinni mixo loosu widira soorrantanni no.
Konni albaanni diru mixo qixxeessinanni loossa hananfirono; gumulshu woffiimaho. Isilanchimmano hattonni huluullissannotenkanni. Loosu ripoorte yine shiqinshannihu kayinni guuta ikkino garinni gumulloonni yinanniiti. Togoonni daga awaawura mootimmatenna dagate mereero mimmito huluulamate geeshsha iillishshinota la’nanni.
Daga halaale loosannoha hasidhanno. Halaale amande dagate soqqama dagatenna mootommate mereero noo xaadooshshe kaajjishshanno. Mimmitu mereero ammanama heedhanno gede assitanno.
Sidaamu qoqqowirano baxxinohunni sa’u shoole dirra kawa addintanni jawaatanna daga gutunni horaameeyye assitannoti latishshu loossa gumulantanni no.
Sa’u muli barrubba giddo qoqqowu pirezidaantichi kalaa Desta Ledamohunni massagantinori mootimmate loosu massagaano babbaxxitino qooxeessubbara loosante dagoomaho owaante uytanni noo pirojekitubbanna hanafante ijaarantanni nootano towaattino. “Ayi coyi’ro noohu; ayi lasso shii’rinohu” yinanninte gede Itophiyu pireesete uurrinsha eeli geeshsha dirratenni dagate loosamanni noo latishshu loossa towaattino. Konni garinni jawaachishanno gumi maareekkamanni dayinota naqqasa dandiitanno.
Baxxinohunni, doogga, xalalu anganni way uurrinshubba, buussa, rosunna fayyimmate uurrinshubba hattono keerunna ga’labbote loossa yannitte assatenna kaajjishate hende halashshinanni hee’noonni uurrinshuwa loosi danchu deerrira afamanno.
Irshu loosinni ikko saadate ceatto loosinnino maatete deerrinni ikko gaamotenni hattono hallanyunni loosidhanni noori gummaamma ikkitanni dagginota basete leelline buuxate dandiinoonni.
Laalchonna laalchimma lossatenni sagaletenni meessaneeto dandaatenna miinju dhuka lossi’rate amandoonni illachino jawaachishannoho.
Mootimma dagate ledo hasaabbe hasattonsa badatenni dagate hasatto garinni addi addi latishshu loossa balaxo aatenni gumultanni afantanno. Dagate xa’monsa deerru deerrunkunni illachanna adhamooshshe afidhe dawarantanni noo daafira daga lowontanni hagiirraamete. Togo yineemmo woyte baaluri guutino yaa dikkitino. Guutanno gede kayinni mootimma hanaffino latishshu loossa diqilleessa agurre jawaachishanna foonqe noowa taashshidhanno gede halama hasiissanno. Bushinore calla xinqinanni loosaminore misha duumbara qoltannona.
Mootimmatenna dagate mereero noo xaadooshshi gutu hajora gutunni hasaambenna amaalamme loossa hananfe gumullanni hee’noonni harinsho wolootta qooxeessubbarano lawishsha ikkitannote. Xa amandoonni harinshonni addi addi latishshu loossa mixote garinni yinoonni yanna giddo gumullanni dagoomaho owaantete fano assate loosi kaajje sufannota xawinsoonni.
Mootimmatenna dagate jiro hafanfartukkinni horoonsi’rate rosichi jiro hasiisanno illachira hossanno gede assannoho.
Dagate halashshinanni hee’noonni latishshi iillino deerrano mootimmate bissa yanna yannantenni basete geeshsha iillite harunsitannonna xe’ne noowa yanna uynikkinni taashshinanni harinsho albillichono kaajjite sufa noose.
Quchumahonna baadiyyeteno qansootaho loosu kaayyo kalaqo loosi balanxe laooshshu soorro dagganno assine hanafoonniha ikkasinni; baxxinohunni wedellu mootimma injeessitinonsa kaayyo horoonsidhe uminsanni looso kalaqqe loosatenna gummaamma ikkitanna la’noonni. Mootimmanniti muli irkolla heedhuro harancho yanna giddo heeshshonsa woyyeessanno looso loosi’rate kakkaooshshinsa jawa ikkinota babbaxxitino loosu handaarranni maamarunni tantanante loosidhanni noo wedelli farcidhanno.
Qoqqowoho badheessu yanna loossanni woyyaawino laalchinna laalchimma daggino. Kuni rosichi goyirete yanna loosinnino ledamannota agarranni.
Qoqqowu ga’labbo ge’inowa ikkasinni wolootta qoqqowubbanni dooramaanchonna lawishsha ikka dandiino. Xaa yannara babbaxxitino Investimentete, daa”attote, hattono wolootta loossate handaarranni hasi’nanniha ikkasi daganna mootimma keerenna ga’labbo agarsiisate ragaanni murcidhe loossanni noota leellishannoho.
Dagate beeqqo kaajjishatenni hasiisanno latishsha halashshatenna horonsi’raanchimma lossate; sagalete wowenna miinju lopho buuxisiisate gutunni lophate amandoonni murci’raanchimma kaajjite sufa noose.
Bakkalcho Ella 20, 2016 M.D
