Addis Ababa:- 2016 baajeettete dirinni sa’u 6 aganna giddo Abbayi kofatto ijaarshira 643 miliyoone birri ale gamba assinoonnita Abbayi kofatto qineessote pirojekite borro mini egensiisi.
Abbay kofatto qineessote piroojekite borro mini miidiyunna komunikeeshiinete dayirekiterichi kalaa Hayilu Abirihaam Itophiyu pireesete uurrinshara xawisino garinni; amandoonni baajeettete diri umikki bocu dirinni kofattote ijaarshira gobbate giddo boondete hidhonninna baraarshunni 501 miliyoone birri ale gamba assinoonni.
8100 harancho borrote sokkanni qole bocu dirinni 65.7 miliyoone birri ale gamba assinoonnita xawise; Diyaaspooru boondete hidhonninna baraarshunni 4 miliyoone 614 kume birri ale gamba assinoonnitanna Itophiyu caabbichi baraarshu akkaawuntenni 71 miliyoone ale birri gamba assinoonnita coyi`rino.
Dagoomu 13 dirrara boondete hodhonni, 8100 harancho borrote sokkanninna wolootta eo gamba assinanni doogganni kofattote ijaarshi xaa geeshsha taxxi yiikkinni irkosi aanni noota buuxisino.
Kofatto jeefisate loosi hala`lado jiro xa`mannoho yiinohu dayirekiterichu; dagatewiinni xaano ledote jiro agarantannota xawisino. Kofattote ijaarshi qineesso borro mini konni dirinni 1.5 biliyoone birra gamba assate mixi`notano egensiisino.
Gumulshu ragaanni sa`u onte dirrara kofattote baraarsinanni woxi bikki lophanno gede loonsanni keeshshinoonnita coyi`re; diru giddo 1.5 biliyoone birra dagoomuwiinni gamba assinanni hee`noonnita xawisino.
Yannate gobbate akata hedote giddo woratenni eo gamba assinanni harinsho danchu deerri aana afantanno yiinohu kalaa Hayilu; kofattote eo gamba assinanni haaroo`mate kofatto boowe Sidaamu qoqqowira noo yannaranna Bocaasa 29/2016M.D Sumaalete qoqqowo ei yanna geeshsha 1.5 miliyoone birra gamba assinoonnita dayirekiterichu coyi`rino.
Itophiyu daganna ilama Abbayi kofatto ijaarshira eo gamba assa hanaffu yannanni kayise Sadaasa 30/2016M.D geeshsha 18 biliyoone 873 miliyoone birri ale kofattote irko assinoonnita qaagiissino.
Dagoomu 8100 harancho borrote sokkanninna babbaxxitino eo gamba assinanni doorshubbanni hanafino irko kofatto jeefisantanno geeshsha kaajjishe sufanno gedeno dayirekiterichu woshshatto shiqishino.
Abbebech Maatewoos
Bakkalcho Arfaasa 30 / 2016
