Allamurchu arrishshote alba hige la’’ate qarramikkinni la’’a dandaanno; arrishshote widira caange la’’anni buuwa dandaanno kalaqamaati. Kuni kalaqami 2 meetirenna 30 seenti meetirenni kayse sase meetire geeshsha seedannoha ikkanna 5-7 kiilo meetire aana noore woshshaadate hasi’ranno coye seekke bade la’’a dandaanno. Illesi lowo geeshsha maala`lissannote. Woshshaadate hasi`ranno woyte 120 kiilo meetire geeshsha doyisse buuwanno. Xee’ninanniwi nookki qooxeessira noo yannara xeenu dayiro alillitte gotti yee buuwatenni gomichu ale buuwe xeenanna wisho eelaanni assanno ikkinnina xeenu diganannosi.
Allammurchu kalaqosinni woshshaade itanno ikkinnina horontanni reyinore di-itanno. 70 diri geeshsha hee`ra dandaannohu kuni kalaqami 35-40 diri giddo umihunni sagalesi woshshaadate horonsi`ranno culunqa bikku ale lophitannosihura sagale uullate aaninni kaysa hooganno. Layinkihunni miqichu nafa gatikkinni butu asse hiiqqate wolqa noosi afii eramannosihuranna shokkannosihura sagalesi bashsho gede saga`late mitii`manno. Sayikkihunni qoolisinna bisisi aana noo baalluwa batidhanni ha’rate korkaatinni ayirritannosihura bashshosi gede gordo tattaysanni buuwanno wolqa ajjannosi. kuri sase coyibba Allammurchu dirisi qeelamanni daanno woyte xaaddannosi qarrubbaati.
Bue:- Yenya Merreja
Fotograafete Kaaysaanchi Itophiyaho
Kaameera amadinohu fotograafete kaysaanchi Itophiyu baatto mite yee kaxxinohu 1875M.Draati. Fotograafete kaysaanchi Onkoleessa 13,1875M.Dra Atse Miniliki foto kayse attamatenni misilesi leellishi. Yannate foto kayse attamatenni misile woraqatu aana leellishasinni qeesootu widoonni luphiima xiiwo xaaddinosi; Atse Minilikino foto ka’’annokki gede qeesootu waajjishiishshinosinka. Isi kayinni insa yitinore shota gede lae foto ka’’ate ledoteno foto kaysanna hattono foto hayishsha woy attama rosinonka. Addis Ababaho daga foto kayinsanni suuqe fa’nantinohu 1879M.Dra ikkanna tenne suuqe annino Atse Miniliki foto kaysinohu Boyaajiyan yinannihu fotote ogeessaati.
Bue:- “Atse Minilik” Phawuloos Nyoonyo
Diyogaan Fullahaanchu…!!!
Diyogaani aye woyteno horonsi`rannoti mitte egennantino yaatto noosinka. “Egenno xawaabbaho. Egenno noosi manchi xawaabbu noosi. Egenno noosikki manchira barru hashshaho. Egenno noosi manchi kayinni tunsote giddo nafa ha`riro doogo warri yite xabbe leeltannosi!” yaanno.
Mitto barra mittu teesaanchi hashshunni ollaaho doogga tattayisanni hodhanna wolu doogaanchi ledo hedeweelcho kibbami.
Hakkiinni kibbamino manchi ayimma buuxe la’’anno woyte manchu kuni Diyogaaniiti. Manchu kisote hasaawinni Diyogaani togo yiisi “Hay Diyogaan! hada techo geeshsha haafare kultanni noottonke; “Egenno noosi manchira tunsote giddo warri yee leellannosi” diyiitto? Kuneeti techo kayinni fojokki reqecci yite fultu! Ate egennaamoho tunsote giddo leelleemmehero ane ledo dikibbamattonka” yaanni qaccifatisi.
Manchu ikkitonni aaraawinohu Diyogaani mancho togo yiisi; “Rodoo`ya! Afa hooggeeti ikkinnina anera tunsote giddo warri yee leellanni nooenka. Mereeroho ateeti tunsichu giddo leellannohekki gowwi babbattitanni dagge kibbamittoehu” yee isino coyinni kisisi!
Fullahaanchu Diyogaani saadate lowo baxilli noosi manchootinka. Aye woyteno qooxeessasi woshshunni huxxameeti hee`rinohu. Hattono baxillisi takkora woshichisi ledo mitte saanenni saga`lanno; waano mittuwinni hinkiile agannonka yinanni isi daafira kayinsiro.
Hatte yannara woshshu kisinore battete gede assine kiirrannihura mannu baalu Diyogaani assootinni koffi yee aaraawanno. Hattono mitto barra Diyogaani woshshasi hoodete adhinohu mannootu gidensa fushshite hirtanno dikko fuli.
Dikkaasineno Diyogaani faanoosesinna woshshasi adhe insa giddora eanna la`usiro jawa huuronni Diyogaani aana cancitanni “Woshshakki haadhe fuli! Woshshakki fushshinke!” yitanni canca hanaffanno.
Mannootu ikkitonni aaraawinohu Diyoogaani doyissinosi manna la’’anni togo yaannonsa; “Qooxeessa’ya doyissitine raartinanniri… woshshu ki`neeti ikkinnina woshshi`ya ki`ne aana mamoote raari?” yee boroorannonsa.
Gaabbatto Coye Assitooti
Mittu nugusichi ga’mitanno woshsha tonne afi’rinno; kuri woshsha borojjisi mitore huntanno woyte waadatenna itisiisate horonsi`ranno. Barrunni mitto barra mittu borojjichi gara ikkitinokki hedo nugusaho coyi`ri. Konni korkaatinni nugusu lowo geeshsha hanqi. Hakkawoytenni woshshu hoowe giddo tugamanno gede hajajo saysi.
Borojjichuno dadillunni; “Tonne diro wo`ma soqqamummohe, hiramummohe, hajajittoere baala assoommohe; xa kayinni togo assittoe yaate? Eeggatena woshshu hoowe giddo tugama`yara albaanni tonne barra uyie” yee huucci’ri. Nugusuno sumuu yee fajjisi. Woshshu hoowe giddo tungara farandoonnisi borojjichosino kuri woshsha allaale hasiisannore assanni agaranno borojjichiwa mare “Eeggatena kuri woshsha tonne barra agaronsa?” yee xa`mi. woshshu agaraanchino fajjisi.
Fajjinoonnisi borojjichino woshsha dancha gede asse amada hanafi. Co`imma agara, sagalensa yannatenni shiqisha; hayishshanna hasiissannore baala assinsa. Tonnu barrino goofi. Hakkunni gedensaanni nugusu ledo hasaabbino garinni borojjicho shiqeenna woshshu hoowe giddo tugamanno gede hajaji; insano massite tuggu.
Haadhe massite woshshu hoowe giddo tugguri wolootu borojji kuni borojjichi woshshunni hiitto itamara dandaannoro shagaggiisannansa la`anno woyte heddinokki coye illensanni la`u. Nugusuno laino coye ammana hoogi. “Kuri ga`mitanno woshshi aana may iillikka? May xaadinsakka? Yaa hanafita woshshu hoowe giddo massine tungoonni borojjichi woshshu mereero riiqatanni naaxxillunni qaafanni togo yii; “Kuri woshsha tonne barra calla itisummo; danchu garinni amadummonsa insano assoommonsare horontanni dihabbino. Atera kayinni tonne diro wo`ma hiramummohe, soqqamummohe ikkollana kayinni, mitte so’ro korkaatinni duuchanka coye habbe reyote sayisse uyittoe” yiisi. Nugusuno coye wodanchatenninna woshshaho woroo ikkinotano huwatatenni borojjichu woshshu hoowe giddonni fulanno gede hajaji.
Tenne borro sokka: manchu beetti haammata wulata asseennansa kayinni mitte so’ro korkaatinni assinoonninsare baala habbanni bunshetenni ka`annori uurrite meessaneetensa la`anno gede assitanno. Danchummatenni wo`mitino dhagge mitte so’ro korkaatinni ba`anno gede assinonke. Dancha barra ikko`ne!!
Abebech Maatewoos
Bakkalcho Maaja 22, 2013
