Qiddist Gezaheny
Addis Ababa:- Addis Ababu quchumi gashshooti aantaancho kentiiba dukko Adaanech Abeebeti, Ayirrado dokter Abebech Goobena hanaffinoha danchummate looso sufisiissannota ciyidhino. Dokter Abebech Goobena madaarshu amanyooti gumulamino.
Ayirrado dokter Abebech Goobena (Iddaayye) madaarshu amanyooti aana sokka sayissinoti Addis Abebu quchumi aantaancho kantiiba dukko Adaanech Abeebeti; tini jawa ama 41 dirrara loossanni keeshshitinoha danchummate looso quchumu gashshooti sufisiisanno yitinno.
Konnirano Addis Abebu quchumi gashshooti mereershu wo’ma owaantesinni sufanno gedenna dokter Abebech Goobenitehu bayiru loosi shotannokki gede hasiissanno irko baalanta assanno yitinno.
Ayirrado dokter Abebech Goobena sa’u 41 dirrara loossino danchummate loosira galata shiqishshinoti aantaancho kentiiba; ‘’Amanke loossino danchummara ninke asalaammaho; qola noonke. Konnira tenne Miliyoonetenni kiirranni qansooti heeshsho latisinohu danchummate loosi mereershiti aantino fooliishsho maa ikka hasiissanno? Yitanno hedo aana halamme loonso. Togo assa dandiinummorooti amanke lubbo fooliishshidhannohu ‘’ yitinno.
‘’Amanke qarranke tidhineemmo hayyo mittimmanna halama ikkitinota rosiissinonke amaati. konnirano mitte yaatto noose; Qarranke tidhineemmohu mittu manchi tugannonke giggilo saantenni ikkikkinni mittimmatenni, halamatennina kaa’lamatenni qarru aana noore baxxinohunni meento ikkado assatenniiti’’ yite loosunni leellishshino yaatto nooseta kayissino.
Kuni jawa ayimmanna hedo gumaati yitinnoti dukko Adaanechi; qarrantinore iilla qaalunnino loosunnino gumultino. Baxxitino jironna rosu hee’risekkinni baxille, shaqqillenna jawaante uddidhe mannaho hee’ra mannu ooso jeefote ikkadimma deerri bikkaancho ikkinota leellishshannore ikkansa huwachishshino.
Barra 29/10/2013 M.Dnni soodihunni 3:00 nni hananfe Onte sa’’aate geeshsha heedhanno mininni Mesqel Addebabaye, aanteteno Qiddist Sillaase Kaatedraale amma’note mine reeshsha geegiissinoonniha ikkanna barrihunni Honse sa’’aatenni hakkonni madaarshu amanyoote gumulloonni.
Amanyootu aana Itophiyu Ortodoksete amma’no massagaanchi Abune Maatiyaasi, fayyimmate ministrcho dokter Liya Taaddese, Oromiyu qoqqowi qaru gashshaanchi kalaa Shimellis Abdiisanna Addis Abebu quchumi aantaancho Kantiiba dukko Adaanech Abeebeta lede wolootu jajjabbu mootimmate moosu sooreeyye, baxillaanosenna maatese afantino.
Ayirrado dokter Abbebech Goobena koroonu fayya korkaatinni phaawuloosi hospitaalera quuxxote xissamaano golira xagisidhanni keeshshite Ella 27 2013 M.Dni 85 dirisenni tenne kalaqenni rewotenni baxxitino.
Bakkalcho Maaja 1/2013 M.D
