Addis Ababa:- Yemi zoonera gobbaydi dikkora shiqqanno laalchuwa hala’ladunni laashshate illacha assine loonsanni hee’noonnita Zoonete Gashshooti egensiisi.
Zoonete 110 hekitaare baatto aana Rozmeri latinsanni hee’noonni.
Yemi zoone qaru gashshaanchi kalaa Shimellis Ijjigu Itophiyu pireesete uurrinshara xawisino garinni; Rozmeri rosichunni “maala durinshanni mu’ro” ikkanna; sagale coommishi’rate, zaytete laalchira, xagicho qixxeessatenna biinfillu owaantubbara hosannoha ikkasinni kalqete dikkora hasi’nanniha ikkanni dayno.
Itophiyaho shiimu gatinni ikkinnina irshu aana hala’ladunni egennaminokkihu Rozmeri; muli dirra kawa Mereerimi Itophiyu qoqqowira Silxete zoonera hala’ladunni laashshamanni noota xawise; Silxete zoonenni adhinoonni rosichinni Yemi zoonera Rozmeri laalchi hala’lanno gede assate loonsanni hee’noonni yiino.
Rozmerete laalcho Yemi zoonera laashshine egenninoonnikkita xawisinohu kalaa Shimellisi; xa kayinni handaarunni gumaamo ikkate loonsanni hee’noonni yiino. Silxete zoonenni afi’noonni rosichinni Rozmerete latishshi aana dureeyye goshoosha dandiinoonnitanna konninni gobbaydi dikkorano shiqishate dhuki kalaqamanni noota coyi’rino.
Xaa yannara tonne dureeyye Rozmeri latishshi aana bobbahansa xawise; zoonete 110 hekitaare baatto aana Rozmere latinsanni hee’noonni yiino. Konni giddonni 50 hekitaare baatto Investerootunni lattanni nootanna gattinota dagoomu latisanni afamannota buuxisino. Konninni, luphiima laalcho agarrannita kulino.
Yemi zoonera gobbaydi dikkora ikkitanno laalchubba hala’ladunni laashshate loosi aana illacha assine loonsanni hee’noonnita xawise; konninni, haammatu wedelli uurrinshunna yannate geeshshi loosu kaayyo horaameeyye ikkinota egensiisino. Zoonete gashshootino konne kaajjishatenni woyyaabbino heeshsho heedhanno gede loosanni noota buuxisino.
Tayxe haanju harumi amuraatinni kaansanni 8 miliyoone chigginyubba giddonni sagalimmate hossanno laalote gumi chigginyubba qixxaabbinotano kalaa Shimellisi buuxisino. Abokaado, Paapaayya, Muuzenna Maango labbinori qarunni sagalimmate hossanno chigginyubba ikkansa kulino.
Kuri chigginyubba guma laala hanaffanno woyte aantanno dirrara sagaletenni meessaneeto dandaatennino sae laalcho dikkote shiqishatenni miinju horaameessimma lossitannota buuxise; dubbu halashshoranna xaginaateho horoonsi’nanni chigginyubbano kaansanni yiino. Chigginyete kaashshira injiitanno base qixxeessinanni afammannitanna kaansanni hee’noonnitano xawisino.
Yanna chigginye kaasate injiitannota ikkasenni dagoomu konni alba leellishino kakkaooshshe wirro leellishanno gede xa’mino. Chigginyubba kaansihu gedensaanni agara hasiissannotano qummeessino.
Yemi zoone konni albaanni Wodiidi daganna dagoomi qoqqowi giddo noo addi woraddanni mitto ikkanna albi Wodiidi qoqqowi haaro tantano assinisi gedensaanni Mereerimi Itophiyu qoqqowi giddo noo lamala zoonna giddonni mitt ikka dandiitino.
Abbebech Maatewoos
Bakkalcho Maaja 10, 2017 M.D
