Gaazeexu Odeessaanchinni
Ficheete ayyaani dhaggetenni kullanninte gede su’maminohu Ficho yaamantanno Sidaancho seemonniiti. Ficho dirisenni adhamate iillitu woyte Sidaamu budinna amanyooti garinni adhantu. Tini seemo maatesera, roduuwisera, fiixa firahonna qachaho buurisamenna geinto haadhe diru dirunkunni Sidaamu daga diru soorro ayyaana ayirrinsanni barra hadhe xa’mitannonsa.
Ayyaana ayirrinsannihu Qawaadu barra ikkanna dhagge kultanno garinni Ficho abbitino sagale ko barra hashsha fiixu, qachu manninna maate gamba yite saga’litanno. Annisenna koyisamino manni wo’manka woyte Ficho danchummanna abbitino sagalenni xaggeeffatatenni maassi’rannose.
Ficho tenne marro marro assitanni keeshshite tenne kalqenni rewotenni baxxitu woyte qooxeessu teesaano Ficho rewonni jawu dadilli giddo ubbanno. Konninnino ise jili koyisamaano ikkitino daga tenne shaqqado hagiirre kalaqqanno meyaa sufotenni qaagate dandiinanni gede konni alba ise sagale haadhe daggannohanna koyishsha assinanniha Sidaamu daga diru soorro barra su’misenni Fichee yite su’missino yinanni
Ficheete ayyaani Qawaadu barra hosanna. Korkaatuno barru daganniwa lamalate umihanna bayira barra assine adhinannihuraati. Sidaamu daga diru soorro Fichee Cambalaallate ayyaana lame lamala geeshsha iibbadu garinni ayirrinsanniha ikkanna ayirrisate harinshono umise amanyootenna aante afidhino. Kuri budu ikkitubba mereerinni umiti la’’ote.
Ficheete ayyaani duuchanka woyte daganniwa lamalate umi barra yaano Qawaadu barra hosirono; barru diru dirunkunni lawanno barra hosannokki daafira mamoote hosannoro bande anfannihu budillaancho barra kiirranni shallagonninna beeddahe la’neeti.
Beeddahe la’annori Ayyaantote. Ayyaanto “Busa” yinanni beeddahe aganu ofollo ledo noonsa xaadooshshe wodanchite la’’atenna harunsatenni baxxinohunni beeddahete mereero qara ikkitino beeddakko aganunni balaxase buuxxu woyte Fichee aantino barrubba giddo noo Qawaadu barra hossanno gede murtanno.
Aanteteno beeddahe la’e murtanno ayyaanto Ficheete ayyaani hosanno barra Garete massagaanora egensiissanno. Ayyaantootu shiqishshino hedo kaiminni gosate massagaano cimeeyyete ledo songo ofolte hajote aana hasaabbuhu gedensaanni barra lallawunni dagate xawinsanni gede sumuu yitanno.
Gosate massagaanono qooxeessinsara uurritanno dikkora gocu goga seedu haqqi aana sutte amadatenni dagoomaho Ficheete ayyaani hosanno barra lallabbanno. Lallawu gedensaanni safote qeexaali sufanno. Fichee cambalaallate ayyaani dhagge haransinella worroommona jawa dhagge annuwu kultannanke albillitte shiqinsheemmo.
Bakkalcho Dotteessa 12, 2015 M.D
