Abrahaam Saamueel
2023 heewote diro Itophiyu atileetikse gobboomu gaamo umi heewo Awustiraaliya Baatirest Quchumira sa`u qidaamete barra harinseeenna, sai Sanbatu hashsha gobbansara higgino. Sanyote soodo assinoonni adhate amuraatira hattono baraarshu pirogiraame aana hindiiddotenni dukkisamino baxxino baraarsha Iskay Layit hoteelera harinsoonni. Ispoortete heewo battalara agarroonnikki qeelamanna mararsanno coyi kalaqama rosaminoreeti. Itophiyu kalqete gobbuwanni layinki deerra amadde gumultino; kalqoomu gobba taayinse dondanni chaampiyoonera kalaqamino coy ispoortete maate hasaabbannonna illacha tuggano gede assino.
Tenne Chaampiyoonera addintanni agarranni atileetooti giddo mitte jajjabbu seenni 10 km dodansho aana beeqqaancho ikkitinoti Atileeticho Lettesenbeti Gideyite. Lettesenbeti qeelate boode meetire gatte heedheenna xaadinose gawajjonni lekkase hajajama gibbeennase qarrante qeelleete riivaane mura didandiitino. Tenne yannara qeelate boode yanna gatte heedheennase ubbe noota Lettesenbeti qajeelshaanchi Haayile Iyyaasuhu heewote xawi giddora e’’e ubbinota kayise heewote goofimarchi xuruura sa`anno gede assirono, atileeticho heewote gobbaanni ikkitino.
Lettesenbetira, heewote aana togoohu mararsanno coyi xaadiserono, haxose heeshshi assanno coyi nookkita gaamote baraarsha uyni yannara xawinsoonni. Itophiyu Atileetiksete Federeshine Loosu Gumulaano Komite Miilla baalanti hindiiddotenni dukkisante Lettesenbetira ledokki hee`noommo yite xawissinose. Pirogiraamete aana beeqqaano anga gantanna harinsoonni baraarshu amuraatira, Atileeticho Lettesenbeti baraarsha adhitinohuno hindiidotenniiti.
Konninni sunfeenna hasaawa asitinoti Itophiyu Atileetiksete Federeeshiine Pirezidaantitte Kaa`laancho Komishiineritte Deraartu Tullu; umise gadinni ka`e ise amaaltinose. Tenne heewote battalara sase culqu boowe goowaho wodhitinoti Macca Atileeticho Deraartu Tulluti; ”Atilaantu Olompiikera qeeloomma yeti haroommahu, kayinni dikkino; suffino heewora kayinni culqa adha dandoomma. Atino albillicho culqa abbatta. Konni albaanni duucha yannara dancha guma abbootta atileeticho ikkitarono; xaano hammatu gumi agadhannohe. Qixxaaotenni hananfe heewote geeshsha daafurtinoonni. Qajeelshaanote ledo ikkitine jawaata looso loossinoonni; konnirano galaxxineemmo`ne” yitino. Baxxino baraarsha lainohuni, Lettesenbeti heewo qeelate shiima meetire heedheenna uwa hooggeemmero culqa abbitanno; konne ikkeenna, culqu dayno gede assine isera baxxino baraarsha aa hasiissanno yite Loosu Gumulaano gumultinohura Pirezidaantitte wodaninni galattinonsa.
Hallanyunninna gaamotenni 2 culqa, 6 camonna 2 nehaase xaphoomunni 10 meedaaliya Keeniyu hoode ikkite layinki deerra fultino gaamora woxu baraarsha uynoonni. Konninni, culqu meedaaliya afidhino atileetera 45 kume, camote 30 kume nehaasete 15 kume dipoloomaho 10 kume hattono beeqqaanote 10 kume baraansoonninsa. Gaamo konni ali guma abbitanno yine agarirono, heewo harinsoonni gobba xeertinye calla ikkikkinni, heewote yannara iibbillu qoleno konni albaanni rosaminokkihu mannu loosino sarraaqi qarrisinoha ikkinota gaamotenni xawinsoonni.
Heewo kaajjado ikkase calla ikkikkinni, jiffanno heewisamaano heedhurono, gaamo dancha guma borreesiisse higgino. Gaamote massagaancho ikkitinoti Saara Haseniti ise widoonni, heewo harinsi yannara noo diilallote gadi agarroonnikki garinni ayirrinoho. Ha`nummo yannanni kayisse gaamo mittimmatenni loossino daafira kuni gumi daara dandiino yitino. Atileetoota adhinanni amuraati aana beeqqaancho ikkinohu IFDR Budunna Ispoortete Ministire Ispoortete Handaari Ministeere Deetichi Ambasaadderi Mesfiini Cherinnetihu, kuni gumi xaa naaxxisannoha ikkikkkinni albillicho loonsanni loosira rosicho ikkanota huwachishino. Atileeticho Lettesenbeti Gideyiti assitino wo`naalshi daafirano mittore lawoonkehe yee jawaati
Bakkalcho Ammajje 16, 2015 M.D Hamuse
