Gaazeexu Odeessaanonni
Addis Ababa:- Itophiyu Doorshu Boorde seerunni buuxate gadadisanno coyi kalaqaminota kule harinshote aana ledote qorto assinanni gede hajajino. Itophiyu Doorshu Boorde Arfaasa 29,2015M.D Wodiidi Daganna Dagoomi Qoqqowi hundaanni afantanno 6 zoonna Konso, Wodiidi Oomo, Wolayitta, Gaamo, Geedio, Goofanna Ontu addi Woraddara Burji, Baaskeetto, Alee, Amaaro, Diraashe aana harinsoonni dagate huuro gumulo zoonnatenna addi woradda Qineessote Borro Mininni daynoha yannate guma xaadisatenna fiixoonsate looso loonsoonnita egensiisino.
Doorshu Boorde harinshote aana kiironsa ajjinokki doorshu mereershi seerunna doogosi agadhinokki garinni la`niro jawa so’ro loossinota xawissino.Qortote loosi goofi gedensaanni jeefote gumulo uynannita Boorde dagoomu tuqu xaadoshshira egensiissino. Boorde xawishshu aana, zoonete dagate huuro gumulshi harinsho aana loonsoonni so’ro mereero dooraanote mazigawi yannara mazigawu aana noohu malaatu, huuro uyni barra malaatinsoonni malaati ledo baxxinoha ikkinota xawinsoonni.
Mazgawu yannara borrotenni malaatinsoonnihu, huuro uyni barra qubbichunni malaatinsoonnihu dooraanote su`mi mazigabbate leellasinna borreessini yannara qubbichunni malaatinsoonnihu, huuro uyni yannara borrotenni malaatinsoonni malaati leellasi jawa so’ro ikkitinota Boorde faajje assitino. Ledoteno, dooraanote mazigawi aana dooraanote taje wonshine malaatensa borrotenni ikko qubbichunni malaatinsoonnkkitanna 18-50 diri geeshsha noo wedelli nabbawanna borreessa dandaanno yine hendanniri qubbichuni malaatisansa tini jawa so’ro ikkitinota faajjetenni buunxoonnita Boorde qummeessitino.
Wole widoonni, dooraano borreessantino barra qubbichunni malaatinse, huuro uyni barra malaatinsanni baycho tiike assinenna dooraanote mazigawi aana dooraanote daafira wonshinanni taje garunni wonsha hooga Doorshu Boorde so’ro ikkinota xawissino. Huuro aatenna gumu ledo amadisiisante so’ro leeltinotano xawissinoti Boorde, huluullo kalaqanno garinni haammata doorshu mereershira doorate borreessantinorinna dagate gumulo barra huuro uytino doraanote batinyi kiiro ledo la`niro taalo ikkasi faajje assino.
Ledoteno, guma worranni qitse aana fajjinannikkiha sa`ne taashshate looso loonsoonnitanna sanadete aaninni hunate looso loosa; huuro uynanni woraqati batinyi; borreessantinonna huuro uytino dooraano kiiro ledo fiixooma hooganna gumu xawinsanni qitsenna dooraanote mazigawi aana doorshu gumulsisaano malaati sanadete aana malaatisa hooga Boorde qummeessitino. Haammattinoti huuro uynanni woraqatta mittowa qolle erre huuro uynanni saaxine giddo mittowa worroonniwa leellanna qoleno huuro uynoonni yannara huuro aate dirantino dooraanora yannate geehshi ayimmate taje olluu gashshooti massagaanonni beehanna wolootta so’rono doorshu yannara xaadino qarra ikkasi Doorshu Boorde xawissino.
Bakkalcho Ammajje 16, 2015 M.D Hamuse
