Itophiyu daga mittimmatenni xawoho ayirrissanno; luphi yitino dagoomittetenna ayyaanaamittete balchoomubba noonsa diru ayyaanna mereero cuuammete ayyaani mittoho. Ayyaanu amma`note amado gobbaanni ayirrinsanni amanyooti kalaqanno biinfilli qole gobbate su`ma gatamarate harinshora jawa kaa`lo baraasanni no; gobbatenni sa“eno amammandannikki donimmanni borreessame kalqete jiro ikkate geeshshano iillinoho.
Kiristinnu amma`no rosiissanno garinni barru kalqete xagicho ikkinohu Iyyesuus Kiristoosi Yordaanoosi garbira cuuaanchu Yuhaannisinni horonsi’rino barra qaagate gumullanniha ikkirono; konninni sa`ino budillittete balchoomubbano mitteenni amadinoho. Korkaatuno ayyaanu ayyaanaamitte ayyaana ikkasinni ledotenni, budillitte balchoomubba mitteenni amadino garinni iibbe ayirrisamasi; amma`note harunsaanonni sa“e amma`note harunsaano gobbaanni noo mannootino konne barra quqquxamatenni agartanno gede assino. Kuni qole ayyaanaho ledote iibbillenna biinfille ikkino.
“Cuuammete ikkitinokki Uddano tatta’e ba’o” yinannihu gede; amma`note harunsaano barraho seessenna xu`mite xawubba iibbishansa; kahinaatootu kiinatu uddanonsa uddudhe, mazamaraane babbaxxitino kuulla noonsa uddanna uddidhe ayyaanaame faarsonni ayyaanaho iibbille ikkite xawoho seesse leellansa biinfille xawisannohonna ayyaanaamittete gobbaannino batinyunni agaramanno gede assitannoreeti.
Ayyaanu kalqoomu deerrinni UNESCO-te afamishsha afidhino kalqoomu xawu ayyaannanni mitto ikkasi halaalino umisinni, ayyaanu gobbate giddonni sa“e kalqoomu afamishsha afi`ranno gede dandiisinosi. Konninnino gobbate gatamaarshi aana hee`rasira dandaanno qeecha luphi assinosi. Kuni qole ayyaanunniha ayyaanaamittetenna budillittete balchoomubba lossatenni aleenni; turiizimete industire aana baraarsanni no qeechi luphi yaanno gede assinosi. Aanteteno hee`rasira dandaanno qeechi luphiimaho.
Ayyaanu kalaqino kalqoomu illachi ledono amadisiisaminohunni ayyaanu aana koysamatenna ayirrisateno babbaxxitino kalqete gobbuwanni dagganno turiistooti kiiro lexxittanni no; kunino gobba buxima qeelte fulate hanaffino sharrora jawa dhuka ikkannota ammannanni.
Konni garinni xawinsannihu cuuammete ayyaani ayyaanaame amanyootubbanni sa“e bidillitte balchoomubba ayirrisinonna turiistete jiro kaajjishanno garinni keerunni ayirrise hosa jawa bayicho uynasira hasiisannoho. Ayyaana keerunni ayirrisa gobbate gede nooha ayyaanaame, dagoomittetenna miinju horubba agarsiise sufisiisate qaraho. Konnira qole baalunku qansichi yawo luphi yitinote.
Baxxinohunni amma`note harunsaano duuchu garinni ayyaanu horo garunni huwatatenni keerunni hanafe keerunni gumulamanno gede qeechinsaha baala assa agarantannonsa. Konnira ikkanno ayyaanaamittetenna surrete qixxaawono agarantannonsa. Dagano ayyaanunniha ayyaanaamittete, dagoomittetenna miinju kaa`lo horo garunni huwatatenni ayyaanu keerunni gumulame jeefanno gede dandaaminsare baala baraarsa noonsa. Ayyaanu danchu garinni gumulamanno gede badhe ikkite uurra agarantannonsa.
Ga`labbote wolqano ayyaanu keerunni ayirrisamanno gede dagate ledo woyyaabbino qinaawonni millisa agarantannonsa; baxxinohunni ayyaanu xawu ayyaana ikkasinni heedhansara hasiissanno qixxaawo luphi yitinotanna aggaxxinannita ikkitara hasiisanno. Ayyaana bunsha hedonsa gumultannoha assate hasidhanno giddoyidinni ikko gobbayidi wolquwanni agarate hunote wolquwa assitanno millimillo illachunni harunsanna hasiissanno qaafo adha dandiissanno qixxaawo kalaqa hasiissanno. Muli kawa ga`labbote wolquwa adhitanni nooti keere ayirrisiisate loossano kaajjite sufa hasiissannonsa.
Baxxinohunni xa gobbate gede olu giddonni fulloommo yanna ikkitinohura, ayyaanu gobbate daanni noo keere leellanno garinni kalqe baalantera leellishate dancha hedeweelcho ikkannohura; tenne hedeweelcho garunni horonsi`nammora hasiisanno. Ayyaana beeqqate babbaxxitino kalqete gobbuwanni daggino turiistootira gobbate giddo keeshshonsa keeraa`mitinotanna hagiirsiissannota ikkitannonsa gedenna wirro higge dagganno gede woyyitino kaayyo kalaqate Itophiyimmate wodaninni wosinsira hasiissanno!
Konninni qoteho Iyyesuus kiristoosi ilaminohu, cuuaminohu gedensaannino reyino korkaati araara ikkinota hedatenni xa hananfoommoti araaru doogo seyote widira iillishshannonke gede illenke fanne la“a agarantannonke. Konni daafira Xawu Ayyaanna Mittimma,baxillenna qeelle leellishanno garinni giddo noo hornywa Duu’ne gowatenni Ayirrinso!
Bakkalcho Kiiro 9 Arfaasa 11, 2015 M.D
