Keeru lubbotenni noo baalira hooga hasiissannokkiri giddonni qara hajooti. Manchu beettira agurrena saadate,Ceatenna haqqete hattono kalaqama urgaho hasiisannori giddo albisa hajooti. Keeru hoogiro lubbo abbalama,dartu,hudenna moolle manchi beettira ikkitanno. Dubbu urdete giiranni giiramanno;dubbu giiramanno woyte dubbu saada mite urdetenni gawajjantannoha ikkanna miteekke gatturi dannu gobbuwara darantanno. Ceano hattonni. Dubbu giiramanno woyte hayssono buluultanno;moolle ubbanno. Diilallono booraabbanno. Konnira keeru hasiisannonkeri baalinni albisa hasattooti!!
Keeru ba’’anno woyte xawaabbu tunsanno;xawu boono ikkanno. Ga’a xeertinse la’’a haaqee ikkitanno. Hexxo murranni. Baalunkuri qarra calla ikkanno;hagiirru xeerti’ranno. Mannimma fooliishshidhanno gede hasidhurono goxichu xooqanno. Konni daafira duuchanka woyte keerunnire faarsi’ra hasiissanno. Afi’noonni keere agarre keeshshiisha hasiissanno. Keeru waagi muxxete;ikkinohura qorophotenni agara hasiissanno.
Loosi’ne jiroo’minannihu keeru hee’rirooti. Jiroo’minoonni jiro suffinota ikkitannohu keerunniiti. Jirotenni mi’nine,ille ciirre sunqinannihu ce’ne qaammannihu keeru hee’rirooti. Ballaho IFDR xaphommuministirichi Abiy Ahimed (PhD) coyi’ranni keeru hoogiro mi’ninoonni mini mittu barrinni diigamannotanna billaallannota qummeessino. Ee,sa’u sase dirra giddo minna diigantino;giirantino. Jiro soqantino billaallitino. Mannu lubbo abbalantino;mannimma xe’ino. Ama xidditino. Sasu diri giddo tunsino tunsichi IFDR mootimmanna HWHT Wodiidi Afrikira Piritooriyaho assitino keeru sumiimme aganna kiirsiissinota ikkitanna keeru caabbichi kayinni latishshaho bee’o uyino;xiddu dukkana daddarino;gibbote huxxa diigino.
Sase dirrara aliyyeenni Tigirayete soqantino jiro shiimu barri giddo latate widira alba wodhitino;xeertidhe keeshshitino maate Yesuusi ilamishshu ayyaana mittimma ayirrissino. Tunsichu goli caabbichunni hiiqqaqqamino;duuddote heeshsho bilbilunni fa’nantino. Horophilu keeru soqqamaancho diilallote aana Meqele quchuminni Addis Ababa;addis Ababunni Meqele saeno Addigiraate iillishino. Kuni baalu keerunniiti.
Keeru nookki gobbara daanno dureessi,dagganno Turistooti,iibbanno daddalinna investimente dino. Keerunni fulle keerunni ea halchote ikkinniina halaalunni xeertidhanno. Keerunni fulle keerunni ea xeertidhuro miinju soqamanno;gawajjamanno. Gobbayidinni giddora,giddonni gobbara eannonna fulannohu dihee’ranno. Kunino heeshshote aana iillishanno miinju hekko aleenni tii’u gawajjo luphi yitanno.
Sa’u dirra aliyye gobbanke ragira roorimankanni Tigirayete,Affaaretenna Amaaru qoqqowubbara keeru booraambenni ledo amadaminohunni ayyaanna ayirrisa gattona eanna fula yaaddonna dadille ikkite keeshshitino. Techo hattenne shigiggissanno busha yanna sa’’annokkiri dinona badhishsha assine qaanganni techo afi’noommo keere galantanni ayyaanna hagiirrunni ayirrinsanni hee’noommo. Sa’’I gannu ayyaani Itophiyu dagara qaccetenni qaccete geeshsha hagiirru ba’latto uddisiisinoho, aantete daanno cuu’attote ayyaanino togoonni sa’’annoti huluullo di heedhanno hajooti. Konni daafira ga’anke keeri kaajjinoha ikkanno gede baalinke uminke yawo fula agarantannonke.
Olu bunshe baalunkunni roore urdete qachira heedhe kakkalantanninna ilansa,jajjansanna heeshshonsa hooggu maatenna bissa naqqasso. Konne hiikkunni qansichinni roore naqqassannori giddo sayissinoreeti. Keeru mageeshshi geeshsha manchi beettira duuchurinni roore umihunni hasiisannoro insa naqqasso. “Ayi coyi’ro noohu;ayi lasso shii’rinohu” yaanno mammaashshu.
“Raaro kandiro Raachaho godowu milli yaanno” aliyyeenni ka’anno urde mitto mittonka mine gangantanno daafira aliyyeenni urde ka’uro soojjaatigeeshsha soojjaatinni galchimi geeshsha amate godowi hembeelamanno;miinju soqamanno;heeshsho muxxe ikkitanno.
Konni daafira;keeru lubbotenni hee’nummo geeshsha hoongammora hasiisannokki coy giddo umiha ikkasi huwata hasiissanno. Keere waagunni bikka didandiinanni. Keeru qorophotenni agarre amada hasiissannonke ga’anke hexxonna woweeti. Konne ikkino daafira keeru waatira uurratenni afi’noonni keere sufinoha ikkanno gede baalinke qeechanke fula hasiissanno!
Bakkalcho Arfaasa 4, 2015 M.D
