Bire yannara baca saada, me’’e, gereewo, faradonna gaango noosi dureessi noonka. Konni aleenni woxu mini giddo bae culkinna birru noosi. isi hundaanni galtanno mannooti isi gede dibatidhino ikkinnina mitiri noonsa. Ikkolla ikkinnina kuni bacu culkinna birru anni halashshe loosi’ranno baatto hala’do noosi. mitte gobba hudhidhuha ikkiro konni manchiwa dagganni batinye gide hidhitanno. Konninni kainohunni lowo woxi noosi.
Ikkolla ikkinnina mooraano dureessa la’e agurtannota agurina buxaneno afidhuro mulqitannohura konne dureessa mulqate mixidhe amalantu gedensaanni woxe duunanno minira e’e kiirre fullannikki culka adhite quchumunnino xeertidhe hadhe mittu dubbi giddo maaxante hakko hosse hakkonni galtu.
Konninni kainohunni lowo geeshsha hudiisseennansa mitto coye heddu “Sasunku giddonni mittu manchi maaxame ha’re sagale hire abbonke; kaayyo fushshino” yiteenna kaayyo fultinosihu mittu quchuma ha’re hiranno gede soyami.
Isino quchuma iillihu gedensaanni lowo geeshsha hudiissinosihura sagale hirikki asse ite insarano agelgiletenni wonshe dubbu widira ha’ranni hee’reenna hedosinni mittu coy dayennasi “Mayra togo diasseemmo. Aneetiro insa ledo mitteenni di’’iteemmo. Hurbaate’ya duuweyti itoommohu; konni daafira sagalete giddo hadho wore massummonsaro hudidhinohura haafatte itanno woyte hadho hakkawontenni shitannonsa. Hakkiinnino hakkoye baala woxe diani callu afirummo yaate?” yee hedinonte gede asse haare massanno woyte insano “Daanno woyte haxosi ganne shinummohu gedensaanni culka lameho beeqqinummoro baca woxe ikkannonke” yite amaalante agartinoriwa shiqqi yiinoha hedikkiinni haxo gante shitusi gedensaanni hude amaddinonsahura agelgile fante haafantanni lame sase higge chuucu gedensaanni insano reytu. Ku’uno anera calla yee hedinoti seekkukkinni gatteenna reye bai.
Hakkiinnino woxu mooraminosihu dureessu manchi mooraanote haruma hasate hajo la`annonsa bissara egensiiseenna woxu noo bayicho harunsite iillitu. Bayichoho marte la`anno woyte sasenti mooraano lubbotenni dino. Woxeno kisamikkiinni annaho qoltu. Hakkuri gobba waaddino mooraano hakkonni reytino bayichira madaarante gattu yinanni.
Manni jiro beebbatenni adhine intannikkita huwata hasiissannonke; mooraanchimma dancha dikkitino; manni hunkeenna daafuro kissooti. Afi`rate looso loosa doodhi.
Abbebech Maatewoos
Bakkalcho Maaja 7, 2014 M.D
