Manchi beetto ikkine kalaqammi eega sharro digooffanno. Sharo bacate;heeshshote sharro,poletiku sharro,dagittete sharronna labbeemmere ikkitanna kaaliiqino manchi beetto daafure dafe hunkiisinni itanno gede hajajino.
Loonse, daafurrenna danfe intannihu injiitino poletiku ga’labbo,diilallote akatinna keeru hee’rirooti. Tenne heeshshote olto giddo duuchunku umisira calla hogoofi’rannoha ikkasinni mimmito mica,xiiwanna horra heeshshote biso ikkitanni daggino;kayinnilla baatto diruukkitino.
Baatto ruukkano hoogguro IFDR bayiriidi seeri mitte daga umo’ya dandoomma yituro poletiku dawaro afidhanno gede kade woranno. Sidaamu daga seeda diro umisenni umose gashshate xa’mo xa’midhanni keeshshitinoti addaho. Ikkollana miincanna,awaawurrann a,latishsha ikkinnina qoqqowu mayinniho yinanni awaawurranna keeshshitino daga bocaasa 10/2012 M.D ni dagate kaajjadu baqqeenyinninna mittimmanni dagate huuro tungeenna umisi umosi gashshate qoosso buuxantu.
Ella 17/2012M.D mite yine seedu diri sharro suusa mootimma safi’niti qaanganni hee’nanni barraati. Poletiku sharro soorrote gashshootinni guma laaltunkunni tenne lamala giddo hamusete barra lamu diri kiirame sa’I ella 27/2014 M.D. ee;poletiku xa’mo,meessi ilamanni meessaneeto gashshatenna latate xa’mo tenneeti.
Sidaamaho Poletiku xa’mo dawaro afidhino. Aantete Sharro Loosu Hoonginna Buximate Hattono Moorunna Mussinnu aana Ikkiitara hasiissanno!
Sidaamu Qoqqowi giddo looso hooggino wedella looso gaammeemmo’ne yaatenni muishsha xa’mitanno mootimmate loosu bissa leeltanno gede Ella 27/2014 M.Dirinni Sidaamu dagoomu qoqqowi mootimma kaajjishi’rino barra ayirrissara fultino daga qummeessitino. Sidaamu Qoqqowi Daga; mootimmano gargartannonsa gede woxatatto shiqishidhino. Kunini assooti alba wodiidi giddo hee’ne qarrammi qarraati. Xa kayinni aye ooso looso gaammara aye woxe xa’minanniyya? Sharrammoonnihu duuchanta wolaphate ikkinota duuchunku huwate taalo owaante aa hasiissanno.
Beeqqaano amadisiisseno, “Oosonsati loosu hoonge qarri mootimmatenni mala afi’ranno yite hexxitannota coydhe; loosu gaamooshshi widoonni leeltanno fiixoomimma kaima assino loosu gaamooshsheno qorqortankera hasiissanno” yitino.
Sidaamu Qoqqowi Pirezidaantichi Kalaa Dest Ledamohu, togoo ikkitubba qarra ikkitino gede moroma dandiinannikkita kayse; togoo qarrubba taashshatenno lallawa fushshine loonsanni hee’noommo yiino. Dagano togoo assoote la’anno yannara qummeessa uytanno gede pirezidaantichu qaale worino.
Manchi beettira wolu diini buximate;buxima kayinni loonsella fullanni. Looso doora kayinni manchi beetto ciiggishshanno; sa’eno gobba dilatissanno. Buximate dhiiginni fulate Sidaami baatto shama shaqqadote. Winxire laashshitanno baattooti. Konneno deama dihasiissanno.
Qoqqowu safamino 2ki diro ayirrinsara albaanni qoqqowoho loosantino latishshu loossanna pirojekitubba daa’’antoonni. Loosantino pirojekitubba gooffe maassamase naaxxissannota ikkase deama dihasiissanno;korkaatuno busulu qaaqqi uyinoonnisiha itanni wi’lanno yaanno maammaashshi mulla dikkino. Pirojekite mittu barrinni loosante gooffannota dikkitino. Lamu diri giddo sidaamu daga afidhino klaayyo shiima dikkitino. Ikkollana hasi’noonni bikkinni ikkinoyya yiniro xe’ne dihoogganno. Kayinnilla mitte gobba mittu barrinni gatamarante gooffannokkita huwata danchate.
Wole widoonni kalqete deerrinni gobbate lophora guficho ikkannohu mussinnaho. Mussinnu birra aanna adha calla dikkino. Pirojekituwa loosate garafotenni qeelino hallanyi woxesi ikkinnina isilanchimmate diqarramanno. Mitto diro loosikkinni buusu tatta’’anna la’nanni;maassiinseenna boco diro owaante uyikkinni xo’’anno waanna diigamanno ijaara minu kiiro. Kuni gobbate lophora gufichoho.
Coyinke aana mitte gobbara gashshoote ginbanni gede assannohu baincho assooteetinna mooraho. Daga moorunninna mussinnunni caaccaabburo mootimma woqassanno woqasu bati’ranno woyte cancoho taraawanno. Cancu kayinni gobbate lopho ciiggishe keere booreessanno. Keeru booraanbe manchi beetto dartaho tugatenni sae keeraano qansooti eddaramanno gede busha kaayyo kalaqanno. Gobbate aana kalaqamanno qarrinna bushu kaayyi;yaano qansootu eddaramme diinaho faro fantanno; gobba diigantannohuno hakkawoyiteeti.
Gobboomu deerrinni Sidaamu dagahu bayiriidi seeri worino garinni dawaro afi’reenna Sidaamu daga umisenni umose gashshate kaayyo afidhu eega; xa hasiisannohu buximate aana gaadate;mooranna mussinna gargarate. Togo ikkiro Sidaami baatto kalqete deerrinni albisa ikkitanno barri dixeertote.
Yaareed Geetaachew
Bakkalcho Ella 30 , 2014 M.D
