Kalqenkera babbaxxitino gobbuwara danchummate fajjo owaante uytanno hallanyooti, gaamonna uurrinshubba bacate. Itophiyahono qansootu babbaxxitino dagoomitte handaarranni dagoomaho danchummate fajjo owaante uytanno.
Baxxinohunni hawadi yannara danchummate fajjo owaante aate rosichi bude ikkanni dayno. Hallanyunni ikko gaamotenni dagoomitte yawonsa fulate assitanno irkonni haammata dagooma horaameeyye assitanno. Konninni, dhuku noonsakkire dagoomu bissa, mundee hasiissannonsarira aatenni, minu akkalinonsarira gatamaratenni, iillino gide midatenni, gawajjamino qooxeessa agaramanno gede chigginye kaasatenni, hawadi yanna guwuurshu roso aatenni, doogga gatamaratenni, quchumma feyaatenna biifisate hattono wolootta owaantubbanni baatooshshiweelo owaante uytanno.
Danchummate fajjo loossa mannu uminsa fajjonna kakkaooshshinni daafurinsa waaga xa’mitukkinni roore yanna dagoomitte handaarranna hajubba aana beeqqitanno mannihimmate owaanteeti.
Hawadi yanna gobbankera roorenkanni rosaanote fooliishshote yannaati. Diru giddo roore yannansa rosu battalara sayissinori hawadi yannaraati fooliishsho assidhannohu; maatensa xa’mitanni towaattannohu. Quqquxantanni agadhitanno yannaati. Tenne hawadi yannanni qooxeessinsara ikko addi addi qooxeessubbara millisse danchummate fajjo uytanno. Dagoomuno baatooshshiweelo afi’ranno owaante ikkinohura hawadi yanna quqquxammetenni agadhanno. Wedellu dagoomaho uytanno owaantenni gobbate latishshinna lophorano qansichimmate yawonsa fultanno. Kuni rosichi roorenkanni hawadi yannara bude ikkanni dayno.
Gobba lattannonna lophitannohu qansootu danchummate assootinni beeqqonsa kaajjishshuha ikkirooti. Gobbankera kiironsa baca wedella beeqqaano assannohu hawadi yanna danchummate assooti babbaxxitino qooxeessubabra dagoomu latishshi hala’lanno gede; fayyimmansa agarantannonna woloottano dagoomitte hajubba gumulantanno yannaati. Kuri loossanni babbaxxitino qooxeessubbara addi addi qarrubba tidhantanno. Halamme loonsanniha ikkasinni harancho yanna giddo dagoomu mitiimma tirrannihura owaantete horo luphiimate.
Tayxe hawadi yannarano gobbankera babbaxxitino qooxeessubbara danchummate fajjo owaantenni haammatu wedelli beeqqaano ikkanno garinni balaxote qixxaawo assinanni keeshshineenna loosu faaajjetenni hanafamino.
Sa’u seeda dirrarra gobbate baalante qooxeessubbara wedella beeqqaano assatenni babbaxxitino danchummate fajjo owaantenni haammata loossa gumulantino. Hananfoonnihu tayxe hawadi yanna danchummate fajjo owaantennino 14 handaarranni dagoomaho owaante uytanno wedella maareekkine qajeelsha uynoonnita kulloonni.
Gobboomu deerrinni harinsanni danchummate fajjo owaantenni gobbate latishshinna lophora jawa irko ikkitanno loossa gumulantannota agarranni.
Gobboomu deerrinni harinsanni hawadi yanna danchummate fajjo owaante loossanni haammatu qansooti horaameeyye ikkitanno. sa’u muli dirra kawa arri yanna danchummate fajjo owaanteno hanafisiinsi kawa haammatu wedelli beeqqaano ikkitanna kiironsa baca dagoomu bissanno horaameeyye ikka dandiitino.
Danchummate fajjo owaante loossa buxima hunatenna meessaneete dandaate assinanni sharrora jawa irko ikkitannoti addaho. Baatooshshiweelo uynanni owaante ikkasenni dagoomu kasseenyinni buqqeete kasseenyano afi’nanni assooteeti. Danchummate fajjo owaante duucha yannara harinsannita assatenni kaajjinshe sufisiisate amandoonni ajuujano jawaachinshannite.
Tayxe 2017M.D hawadi yanna danchummate fajjo owaante loossa Sidaamu qoqqowirano sa’u lamalara Soojjaati Sidaami zoone Daayye quchumira Qoqqowu pirezidaantichi Desta Ledamo faajjetenni hanafisiisinoti qaangannite.
Qoqqowoho sa’u dirrara haammata handaarranni wedellu addi addi dagoomu bissara owaante uytinotanna dagoomuno horaameeyye ikka dandiinota pirezidaantichu tenne yannara coyi’rino.
Konni albaanni uynanni dangoonni owaante tayxe hawadi yannarano woyyaawino garinni haammata dagoomu bissa horaameeyye assa dandiinanni garinni loosa hasiissannota qaagiissino.
Danchummate fajjo owaante loossa owaatamaano daga hagiirsiissannote. Uminsa fajjonni kakka’e dagoomansa owaattanno qansootira kayinni tiiu kasseenya leddannote.
Hawadi yanna ikkito arri yannara gumullanniri danchummate fajjo owaante loossa yannara hajo la’annonsa uurrinshubbanna hallanyootino jawa irkonna halammensa aleellishshannoti anfoonnite. Sa’u dirrara loonsoonni loossanni dancha rosicho adhatenni konni dirinnino gumaamma danchummate fajjo owaante loossa gumullannita hendanni.
Danchumma meessaneetiraati. Danchumma assannohu hiittenne yannarano hagiirraamoho. Dagoomasi owaatateno duucha yannara hasatto galtannosiho. Kuni rosichi kaaje sufara hattono dagoominkenna baxxinohunni aja dume ragaanni bude ikkanno gede agarranni. Tenne owaante konni albaanni wedellu gadacho calla assine la’nanni laooshshi gateenna wedellu annimmatenni beeqqaano ikkanno garinni irkissanno mootimmatenna hallanyu uurrinshubba kiirono lexxitanni daggino.
Aja dume egennonsanni, wolqansanni, hedonsanna fooliishshote yannansanni dagoominsara danchummate fajjo owaante loossanni sayissanno harinshono jawaachinshannite.
Amsaalu Felleqe
Bakkalcho Maaja 10, 2017 M.D
