Gafa 3
Anni’ya fulinowiinni higanna ledosi afoommakki beetto tuanaame waajjo saaynera hurbaate haadhe ledosi daggu. “Misxire maxxaash?” yii Iyyoosaafixi. Ise maricho yituro bainoe, “Ahu mexxa” yituha lawinoe kayinni. Ballo wuy, callankanni waahanni dawomma amaaranyi kokkete miqicho ikkaeraati? Misxirinna Iyyoosaafix Amaaru afiinni hasaawansa bocanno, ani ane bushiishe oso’lannoha laweennae hiddanaawanni noomma.
Iso amantanni, anino hakkeeshsha bushiinshanniere diafiroomma seesalittetena maricho bushiishshannoe. Uminsa qarraati! Anni’ya Missire, yee woshshie “Yee” yuumma, Iyyoosaafixinna Misxir Amaaru afiinni alba kolishshi’roommati. Waa xorshite uyinke sagale intona yiie! insa ane hellee ittanna ani sagale iteemma yee wodani’yanni, waa abbe balaxe annaanni angara worumma. Insano hayishiishinsa yiie anniya; fooggalumma, wiliilumma! Iso amantanni ane yiinoeri nooni, insa insawalla hasaawina yee, angate waa eensa, hayishiishaanchoho dunammara haare haranni noomma waa doge tallaabbe Iyyoosaafix aana dunumma. Doge, masoommaha lawe, fooggalo’yaatiro fuloommana sammi yuumma.
Anni’ya ittane hanqe lame qaale, hay jajjarakki, yee xone”e aguri. Iyyosaafixi anera giirame uduunne soorriraraati lawinoena mininni fule hari. Misxiri oso’litannilla no. Waa dunummati aneeti, dunnihu Iyyoosaafixi aanaatina ise may osolshiishannoseyya! coyinke aana dagganni heedheenna ise kokke dihaadhinoe.
Iyyoosaafixi hari ragaanni gatannoha laweenna wodanu dibbe ga’nannoe. Anni’ya Misxiri woshshe, “soodo ani gute hareemmo, Missiri boorrassoonke” yii. “Qarru dino ani noommase” yitu bacate naadeemmaseti. Iyyoosaafixi xaa geeshshano didayino, anehu bocu qalbi isi ledo hare no. May kisanni nooe? ledo lophinoonnihu gede Iyyoosaafix mininni fulita cuqqo curuqqo hoolieri maati? iso amanta wona mine heere afoommakki amaaranyinni difooggashshannilla nooe, yee sammi yuumma.
Anni’ya Misxiri woshshe soodo xaaddinanni, xa hadhe goxi, Iyyoosaafixino agarannohena yiise. Mawoyye, yee uullanni shootti yee kae, minu mamaati? yuumma. Beetto techo difayyitinonso! Ate ay coyishiishihe, yiie anni’ya hanqe. Saale kutuffi yee ofollumma. Misxiri, baqqaalla’ya sunqite”e fulte hadhu. Anni’ya “Soodo ayiddira hareemmo, mule mulenni daye towaateemmohe, qarrisannohe baala Iyyoosaafixira kuli” yiie. Hanniyya Iyyoosaafixi? yee, aninni saale wirro, mawoyye yuumma.
Soodo goxoommawinni aneteete afoommahu 4 saate ikkanno ballaati. Iyyoosaafixi ninke mine boosaallo (sayiloonete) ofolle tolomishiine la”anni no. Iso mitte illenni lae, hashshi ikkito godowa muushshi assitannae, “Annaanna” yuumma. Dawaro dino. Lede “Annaanna” yuummalla, xaano dawaro dino. Atera mine ayi faneennahe eitto? yuumma Iyyoosaafixi.
Ani yoommata agure Iyyosaafixi osolo naqanno. Mayi oso’lishiishaahe, annaanni hiikko no, yuumma lede.
Abbebech Maatewoos
Bakkalcho Ella 16 , 2014 M.D
