Addis Ababa:- Mootimma dagate ha`litinore labbe diigaancho sokko amadde millissanno bissa aana adhitanno qaafo kaajjishshe suffannota egensiissu.
Mootimmate komunikeeshiine owaante ministirchu Dr. Leggese Tullu gobbate yannate hajubba aana sambatu barra uyno xawishshinni egensiisino garinni; mootimma baalante gobbuwara keere abbate loossino loosinni batinye gobbate qooxeessubbara mereerima keere abba dandiinoonni. Mootimma dagate ha`litinore labbe diigaancho sokko amadde millissanno bissa aana adhitanno qaafo kaajjishshe suffanno.
Dagate ha`litinore labbe diigaancho sokko amadde millissanno bissa aana mootimma adhitanno qaafo kaajjishshe suffannota xawisinohu Leggese Tulluhu (Dr); gaancete daddalaano assootinsanni qorowantanno gede mootimma qorophissanno. Babbaxxitino doogonni dagate keere huntanno gaamubba cancishaano shenenna HWHTni bande la`nannikkihura qaafo adhinanni yino.
Xaa yannara mootimma hiikko dani olirano tumo qolate ga`labbote wolqa hiitte yannannino roore qixxaabbinotanna ammansiissanno jawaante aana afantanno yino.
Dr Leggese xawishshi garinni; baalanti ga`labbote tantano adhitino qinaabbino oppireeshiinenni gobbanniha keere hunate lamalate giddo calla Addis Ababaho, Somaalete qoqqowiranna babbaxxitino zoonnara, Oromiyu qoqqowira soojjaati Harargenna soojjaati Baalera cancishate assootira bobbakkino 45 alshebaabi cancishaanote gaamo miilla seeru hundaanni hosse buuxantanni afantanno.
Cancishaano gaamo miillanni 105 kilaash inkoovi xamanja, 13 bireele, 25 arebeeje, 25 saaxine babbaxxino bikki noonsa qale, shoole matariyyesa, shoole isnayippere olu uduunni amadamino. Ledoteno amma`note minnara madaarantino fanjuwa, angate bonbanna mitto mittonkanni olu uduunne uynoonni mashalaqqenni gamba assinanni hee`noonnita ministirchu xawisino.
Ministirchu xawishshi garinni; seera agarsiisate gumulsinanni hee`noonni qaafonni Oromiyu qoqqowira Gujete, Welleggahonna wolootta qooxeessubba aana millisanno shene aana adhonoonni oppireeshiinenni haammata gaamote miilla buluushshinoonni; anga uytino, haammata qodhonna olu uduunnino seeru hundaanni hosino.
Mootimmanniha dagate keerenna keeraanchimma buuxisiisate looso giwatenni huuronsa macciishshiishshanno mite mite bissa noota kaysinohu ministirchu; kuri bissa woy keeru doogo woy gaamote giddora e“anna higgannowa bada noonsata hedisiisino.
Tigirayete qoqqowira mannihimmate kaa`lo shiqqanno gede mootimma xaano murcidhino uurrinsha noosetanna hakko bikkinni loossanni noota qaagiissinohu ministirichu; sa`u lamalara calla 165 jajjabba gongo`mishamaano Meqele iillitinota coyi`rino.
Cancishaano gaamo kalqoomu dagooma dogate horrite amaddino qooxeessubbanni fultinota coyidhurono; xaano Amaaru qoqqowira horrite amaddino Adiarqay, Tsellemt, Abergellenna woloota qooxeessubbanni hattono Affaarete qoqqowira Konoova, Beraahile, Aba’’aalanna Megaale woraddanni fultinokkita xawisino.
Doogo fansiisi`rate yine olu giddora e“ate gadachammeemmo yitannotenni cancishaano HWHTni xawisamannohu olu duduwinna kakkaishshi wirro Tigirayete wedella gudisiisate hedinoha ikkasi buuxisannoha ikkinota xawise; tenne bunshete millimillo Tigirayete daga sharrama noonsata qaagiissino.
Abbebech Maatewoos
Bakkalcho Onkoleessa 11, 2014 M.D
